Türkiyədəki tələbələrimiz: dar gündə Azərbaycan dövlətinin bizə qayğı göstərməsindən qürur duyuruq
Ankara, 15 aprel, AZƏRTAC
Dünyada sürətlə yayılan koronavirus (COVID-19) pandemiyasının ən böyük problem yaratdığı sahələrdən biri də təhsillə bağlıdır. Türkiyə hökumətinin koronavirusun yayılmasına qarşı tətbiq etdiyi metodlar çərçivəsində tələbə yataqxanalarının bir qismi karantin məntəqələrinə çevrildi. Bu qərar, sözsüz ki, qardaş ölkədə təhsil alan soydaşlarımıza təsir etməyə bilməzdi. Ən azı ona görə ki, Türkiyədə ümumilikdə 20 mindən yuxarı Azərbaycan vətəndaşı ali təhsil alır.
AZƏRTAC xəbər verir ki, tələbələrimizin bir qismi koronavirusla mübarizənin ilk günündən başlayaraq Türkiyəni tərk etmək yolunu tutsalar da, onların böyük əksəriyyəti, yəni təxminən 19 mindən çoxu məlum pandemiya probleminə olduqca anlaşıqlı yanaşaraq, demək olar, əsl ziyalı mövqeyi nümayiş etdirdilər. Problemin ilk günlərindən Türkiyədə qalmaq və təhsili davam etdirmək ən düzgün seçim kimi tövsiyə olunurdu. Bütün bunlarla bərabər, Azərbaycan hökuməti tərəfindən Türkiyədəki vətəndaşlarımıza, eləcə də tələbələrimizə dair məsələlərin həlli üçün çevik qərarlar qəbul olundu. Bu barədə aydın təsəvvür yaratmaq üçün əvvəlcə Azərbaycanın Türkiyədəki səfirliyinin məsələ ilə bağlı yaydığı məlumatlardan bir cümləni təqdim edək: “Hazırkı pandemiya şəraitində Azərbaycan ilə Türkiyə arasında hava və quru nəqliyyatı ilə daşımaların həyata keçirilmədiyini nəzərə alaraq, ölkə rəhbərliyinin tapşırığına əsasən bu dövr ərzində vətəndaşlarımıza dəstək göstərilməsi məqsədilə onlara aprelin 1-dən etibarən Azərbaycanın Türkiyədəki səfirliyinə müraciət etmələri üçün imkan yaradılıb”.
Hazırda yaşayış və təhsil prosesləri ilə maraqlanmaq üçün tələbələrimizin bəziləri ilə telefon əlaqəsi qurduq. İndi yuxarıda bəhs etdiyimiz prosesin real nəticəsini azərbaycanlı tələbələrin ifadələri ilə təqdim etmək niyyətindəyik. Yaşadığı yataqxana karantin mərkəzinə çevrildiyi üçün əvvəlcə Azərbaycana getmək istəyən Samsun On Doqquz May Universitetinin Tibb fakültəsinin birinci kurs tələbəsi Oğuz Əliyev: “Etiraf edirəm ki, virusun geniş yayıldığı ilk günlərdə Azərbaycana qayıtmaq niyyətində idim. Vəziyyəti təhlil edəndən sonra, eləcə də məsləhətlər əsasında qərara gəldim ki, təhsilimi davam etdirmək üçün universitet rəhbərliyinin qəbul etdiyi qərarlara uyğun addımlar atmalıyam. Bir neçə gün ərzində yeni bir yataqxanada otaqla təmin olundum. Dərslərimiz internet üzərindən davam edir. Bunun üçün yataqxanada sürətli internetlə təmin olunmuşuq. Yataqxanada yerləşəndən sonra Azərbaycanın Türkiyədəki səfirliyinin ərzaq yardımı paketini aldıq. Sözün həqiqi mənasında, qürur duyuram ki, belə çətin bir şəraitdə Azərbaycan dövləti bizim yanımızda oldu, əsaslı bir dəstək gördük”.
Ankara Universitetinin Psixologiya fakültəsinin dördüncü kurs tələbəsi Nigar Novruzlu isə Türkiyə paytaxtında kirayədə yaşayır. Hazırda təhsilini distant üsulla davam etdirən tələbəmiz fikirlərini belə bölüşdü: “Universitet rəhbərliyinin qərarına görə, imtahanlar kağız üzərində aparılacaq. Hələlik vaxt və mexanizm açıqlanmayıb. Hesab edirəm ki, xarici ölkələrdə yaşamaq şəraiti olan bütün tələbələrimiz üçün ən məqbul variant olduqları yerdə qalıb təhsillərini davam etdirməsi idi. Prosesin ilk günündən Azərbaycanın Türkiyədəki səfirliyinin əməkdaşları tələbələrimizə aid məsələlərlə maraqlandılar. Ərzaq yardımı paketi çatdırıldı. Burada məsələ yalnız qida yardımı almaqda deyil. Ən əsası odur ki, dar gündə, çətin anda Azərbaycan dövləti yanımızda oldu. Fürsətdən istifadə edərək universitetimizin rəhbərliyinə də səmimi təşəkkürümü çatdırıram. İlk andan tövsiyə etdilər ki, xarici tələbələr üçün sağlamlıqlarının təhlükəsizliyi və təhsillərinin normal davam etməsi üçün ən münasib hal Ankaranı tərk etməməkdir”.
Ankara Universitetinin Psixologiya fakültəsinin birinci kurs tələbəsi Leman Sadıqzadə də digər tələbələrimizlə eyni mövqedədir. Onun dedikləri: “Hazırda dərslərimiz onlayn davam edir. Hələlik cari ilin ikinci sessiyasına dair imtahanların necə olacağını bilmirik. Ən əsası odur ki, dərslərimiz proqram üzrə keçirilir. Virusla bağlı olduqca həyəcanlı günlər yaşadıq. İndi əvvəl yaşadığım yataqxanada deyil, tələbə yoldaşımın yanında məskunlaşmışam. Çox təşəkkür edirəm ki, belə çətin məqamda Azərbaycanın Türkiyədəki səfirliyindən dəstək aldıq, ərzaq yardımı çatdırdılar. Bütün bunlara görə dövlətimizə minnətdarlığımı bildirirəm. Həyəcanlı günləri arxada qoyduq. Əminik ki, tezliklə həyat normal axarına düşər. Məncə, tələbələr üçün ən düzgün qərar yaşamaq şəraiti olduğu halda təmsil olunduğu ölkədə qalıb təhsili davam etdirməkdir”.
Yıldırım Beyazit Universitetinin Tibb fakültəsinin ikinci kurs tələbəsi Emin Məhəmmədli də qəbul olunmuş qərarlar əsasında hazırda təhsilini Ankarada davam etdirir. Onun söylədikləri: “Böhranlı günlərdə ərzaq təminatı ilə bağlı Azərbaycanın Türkiyədəki səfirliyindən göstərilən yardıma görə, bu işdə zəhməti olan hər kəsə təşəkkür edirəm. Çox qürurvericidir ki, dara düşdüyümüz bir vaxtda bütün çətinliklərə baxmayaraq dövlətimiz bizə dayaq oldu, özümüzü diqqət və qayğı içərisində gördük”.
Xatırladaq ki, qlobal xarakter daşıyan COVID-19 pandemiyası ilə əlaqədar bu il martın 15-də saat 00:00-dan etibarən Azərbaycan və Türkiyə arasında uçuşlar dayandırılıb, sərhədlər müvəqqəti bağlanılıb. Ötən müddətdə Türkiyədəki vətəndaşlarımızın təxliyəsi, onlara aid hüquqi məsələlərin həlli, eləcə də yataqxanası karantin mərkəzinə çevrilən tələbələrin yeni yaşayış yerləri ilə təmin olunması, aztəminatlı, həmçinin müvəqqəti çətinliyi olan tələbələrə ərzaq yardımı edilməsi istiqamətində əsaslı işlər görülüb. Ən əsası odur ki, özlərinin dedikləri kimi Azərbaycan dövlətinin diqqət və qayğısından məmnun qalan gənclərimiz baş verən proseslərə ayıq gözlə baxır, təhsillərini həvəslə davam etdirir, nikbinliklərini qoruyurlar.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
