SİYASƏT
Türkiyəli general: Ermənistan və onun havadarları yadda saxlamalıdır ki, “dəmir yumruq” havadadır
Bakı, 11 may, N.Məmmədova, AZƏRTAC
Ermənistan və onun havadarları yadda saxlamalıdır ki, "dəmir yumruq" hələ havadadır: əgər bu ölkəni sülhə sövq etmək mümkün olmasa, bir gün o, qəflətən düşmənin başına enəcək və Azərbaycan öz işini özü görəcək.
Bu barədə AZƏRTAC-a Türkiyənin Azərbaycandakı keçmiş hərbi attaşesi general Yücel Karauz bildirib.
Bundan əvvəl Azərbaycan Müdafiə Nazirliyi bildirib ki, Basarkeçər rayonunun Zod istiqamətində Ermənistan silahlı qüvvələrinin bölmələri tərəfindən qəsdən törədilmiş təxribat nəticəsində Azərbaycan Ordusunun müddətdən artıq həqiqi hərbi xidmət hərbi qulluqçusu Novruzəlizadə Orxan Elxan oğlu şəhid olub. Eyni zamanda, Azərbaycan Ordusunun digər müddətdən artıq həqiqi hərbi xidmət hərbi qulluqçusu Mahmudlu Müslüm Vidadi oğlu başından ağır xəsarət alıb.
"İlk növbədə, Azərbaycan hərbçisinin həlak olması ilə bağlı başsağlığı vermək istəyirəm. Allah ona rəhmət eləsin! Ermənistanın öz mülahizələrini rəhbər tutmasına və öz mövqeyini ifadə etməsinə imkan verməyən bir deyil, bir neçə nəzarətçi, təlimatçı, bundan faydalananlar var. Təəccüblü deyil ki, Türkiyədə Ermənistanı "Yeddi ərli Hürmuz" adlandırırlar (1980-ci illərdə Türkan Şorayın baş rolda oynadığı "Hürmüz üçün yeddi ər" adlı məşhur komediya – Red.). Eyni zamanda, insidentin Azərbaycan və Ermənistan XİN rəhbərlərinin Vaşinqton görüşündən dərhal sonra və analoji Moskva görüşü ərəfəsində baş verməsi də təsadüfi deyil. Ermənistanın himayədarları bu iki ölkənin barışmasını, Cənubi Qafqazda sülhün və sabitliyin bərqərar olmasını istəmirlər. Beləliklə, bir qayda olaraq Vaşinqtonda, Brüsseldə və ya Moskvada danışıqların hər yeni raundundan əvvəl baş verən bu cür təxribatların arxasında Ermənistanın xaricdəki himayədarları və əlləri günahsız insanların qanına batmış qatillərin simasında bəzi daxili ünsürlər dayanır”, - deyə agentliyin həmsöhbəti qeyd edib.
Onun sözlərinə görə, məqsəd – regionda sülhün və sabitliyin perspektivlərinin mövcud olmaması görüntüsünü yaratmaq, Azərbaycanı təcavüzkar kimi qələmə vermək və bunun əsasında bu ölkəyə təsir etməyə çağırmaq, məğlub olan tərəf kimi yeni status-kvo ilə barışmamaq arzusuna haqq qazandırmaq, Azərbaycan Respublikasının ərazi bütövlüyünün tanınmaması siyasətini davam etdirməkdir.
“Eyni zamanda son təxribat Prezident İlham Əliyevin bir gün əvvəl Şuşada qətiyyətli çıxışı ilə bağlıdır və erməni tərəfinin Azərbaycanın dövlət başçısının inamlı mövqeyi və Azərbaycan Ordusunun döyüş meydanındakı cəsarəti qarşısında gücsüzlüyünü nümayiş etdirir. Lakin Azərbaycanın səbrinin öz həddi var. Ermənistanın xarici havadarları dividendlərindən imtina etməklə, bu ölkəni sülhə sövq edə bilməsələr, ilk növbədə, Rusiya Ermənistanı üçtərəfli razılaşmalara əməl etməyə məcbur etməlidir. Onlar yadda saxlamalıdırlar ki, “dəmir yumruq” havadadır. Bir gün o, qəflətən düşmənin başına enəcək və Azərbaycan öz işini özü görəcək”, - deyə türkiyəli general vurğulayıb.