AZƏRTAC-ın Anadolu Agentliyindən aldığı xəbərə görə, Gürcüstan Prezidenti Mixail Saakaşvili Türkiyənin Baş naziri Rəcəb Tayyib Ərdoğanla telefon danışığında ondan Gürcüstanla Rusiya arasında münasibətlərin yaxşılaşması üçün vasitəçi olmağı xahiş etmişdir.

Rəcəb Tayyib Ərdoğan vasitəçi olmağa razılıq vermiş və ümidvar olduğunu bildirmişdir ki, onun vasitəçiliyi uğurlu olacaqdır. O, söz vermişdir ki, sentyabrın əvvəlində Ankaraya rəsmi səfərə gələcək Rusiya Prezidenti Vladimir Putinlə görüşdə bu mövzuda söhbət edəcəkdir. Türkiyə hökumətinin başçısı ümidvar olduğunu söyləmişdir ki, onunla Rusiya dövlətinin başçısı arasında dostluq münasibətləri yaranacaq və o, V.Putinlə Rusiya-Gürcüstan münasibətləri mövzusunda yaxşı bir dost kimi danışacaqdır.

Telefon söhbəti zamanı Ərdoğan Mesxeti türklərinin Gürcüstana, öz doğma yerlərinə qayıtmasına razılıq verilməsi məsələsini də qaldırmış və xatırlatmışdır ki, bu məsələ Avropa Şurasının nəzarəti altındadır.