Türkmənistanın strateji mövqeyi Azərbaycan üçün yeni iqtisadi imkanlar açır - ŞƏRH
Bakı, 24 iyun, AZƏRTAC
Mərkəzi Asiyanın mühüm respublikalarından biri olan Türkmənistanla Azərbaycan arasında münasibətlər son illərdə keyfiyyətcə yeni mərhələyə qədəm qoyub. Təkcə tarix, mədəniyyət, etnik və dil baxımından deyil, eyni zamanda, siyasi və iqtisadi əlaqələr kontekstində bir-birinə yaxın olan bu iki ölkə qarşılıqlı hörmət, bərabərhüquqluluq və milli maraqlara əsaslanan əməkdaşlıq modeli formalaşdırıb. Bakı ilə Aşqabad arasında əlaqələr demək olar ki, ölkələrarası münasibətlərdən önə çıxaraq artıq strateji tərəfdaşlıq xarakteri daşıyır. Elə Türkmənistan Prezidenti Sərdar Berdiməhəmmədovun Azərbaycana dövlət səfəri fonunda bunu aydın görmək mümkündür. Hər şeydən əvvəl əminliklə demək olar ki, Türkmənistan Prezidentinin Azərbaycana dövlət səfəri Bakı ilə Aşqabad arasında əməkdaşlığın daha da möhkəmləndirilməsi baxımından xüsusi əhəmiyyət daşıyır.
Bu fikirləri AZƏRTAC-a açıqlamasında Milli Məclisin deputatı Nəsib Məhəməliyev bildirib.
“Azərbaycan və Türkmənistan xalqları əsrlər boyu ortaq tarix, mədəniyyət və mənəvi dəyərlərlə bir-birinə bağlı olub. Hər iki xalq Türk dünyasının ayrılmaz hissəsi olan mədəniyyətinin, tarixinin, adət-ənənələrinin qarşılıqlı olaraq tanıdılması istiqamətində atılan addımlar ölkələri bir-birinə daha sıx tellərlə bağlayır. Azərbaycan Respublikasının Prezidenti İlham Əliyev türkmənistanlı həmkarı ilə keçirdiyi görüşdə dediyi kimi biz müntəzəm olaraq yaradıcı kollektivlərin çıxışlarını təşkil edirik: “Elə bu yaxınlarda, bu ayın əvvəlində həm Aşqabadda, həm də Arkadağda Azərbaycan Mədəniyyəti Günləri keçirildi. Keçən il isə Türkmənistanın mədəniyyət xadimləri həm Bakıda, həm də Gəncədə keçirilən Mədəniyyət Günlərində bizi ziyarət etdilər”. Dövlət başçısının qeyd etdiyi kimi bütün bunlar bizim birliyimizin nümayişidir”, - deyə deputat diqqətə çatdırıb.
Deputat qeyd edib ki, Azərbaycanla Türkmənistan beynəlxalq təşkilatlar daxilində də səmərəli və bir-birinin prinsipial mövqeyinə hörmət prinsipi əsasında əməkdaşlıq edir. Bakı və Aşqabadın Türk Dövlətləri Təşkilatı çərçivəsində əməkdaşlığı isə ümumilikdə Türk dünyasında əməkdaşlığın güclənməsi, ortaq maraqlar əsasında əlaqələrin genişləndirilməsinə xidmət edir. Təsadüfi deyil ki, son illərdə türk dövlətləri arasında inteqrasiya proseslərinin sürətlənməsi fonunda Bakı ilə Aşqabad arasındakı əlaqələr yeni məzmun qazanıb. Bu baxımdan Sərdar Berdiməhəmmədovun Azərbaycana səfəri Türk dünyasında həmrəyliyin gücləndirilməsi, iqtisadi və siyasi əməkdaşlığın dərinləşdirilməsi istiqamətində mühüm hadisə kimi qiymətləndirilə bilər.
“Azərbaycanın region ölkələri, xüsusilə də Türkmənistanla daha bir səmərəli və çoxtərəfli əməkdaşlığı Mərkəzi Asiya Dövlət Başçılarının Məşvərət Şurası çərçivəsində qurulub. Cənubi Qafqaz regionu ölkəsi olmasına baxmayaraq Azərbaycana Mərkəzi Asiyada böyük maraq və diqqət var. Bakının sözügedən Məşvərət Şurasına tamhüquqlu üzv olması da məhz Azərbaycana Mərkəzi Asiyada olan maraqdan irəli gəlirdi. Təsadüfi deyil ki, Prezident İlham Əliyev də türkmənistanlı həmkarı ilə görüşdə bir daha bu məsələyə toxunaraq ölkəmizin Mərkəzi Asiya Dövlət Başçılarının Məşvərət Şurasına tamhüquqlu üzv qəbul edilməsini tarixi hadisə kimi dəyərləndirdi: “Çünki coğrafi olaraq Mərkəzi Asiyanın bir hissəsi olmasaq da, mədəni və tarixi əlaqələrimiz, həmçinin bu gün regional qarşılıqlı əlaqə və nəqliyyat-logistika problemləri ilə bağlı həll etdiyimiz konkret məsələlər təbii olaraq böyük Mərkəzi Asiyanın vahid geosiyasi və geoiqtisadi bölgə kimi qəbul edilməsi üçün ilkin şərtlər yaradır. Təbii ki, biz ilk gündən çoxtərəfli formatda fəal qarşılıqlı fəaliyyət göstərməyə başladıq”.
Nəsib Məhəməliyevin sözlərinə görə, Azərbaycan ilə Türkmənistan arasında əməkdaşlığın vacib elementlərindən birini də enerji, eləcə də nəqliyyat-logistika sahəsində əməkdaşlıq təşkil edir. Xüsusilə də Xəzər dənizində enerji əməkdaşlığının genişlənməsi ikitərəfli münasibətlərin əsas istiqamətlərindən birinə çevrilib. Enerji sahəsində əməkdaşlıq yalnız neft və qaz hasilatı ilə məhdudlaşmır. Yaşıl enerji, bərpaolunan enerji mənbələri və enerji təhlükəsizliyi sahəsində birgə fəaliyyət imkanları da gündəmdədir.
“Nəqliyyat-kommunikasiya əlaqələri baxımından Orta Dəhliz Azərbaycan-Türkmənistan əməkdaşlığında mühüm qovşaq rolunu oynayır. Azərbaycanın Avropa ilə Asiyanı birləşdirən mühüm tranzit mərkəzi kimi rolu Türkmənistan üçün xüsusi əhəmiyyət kəsb edir. Türkmənistanın Mərkəzi Asiya regionundakı strateji mövqeyi isə Azərbaycan üçün yeni iqtisadi imkanlar yaradır. Prezident İlham Əliyevin qeyd etdiyi kimi, ölkələrimiz arasında bu sahədə əməkdaşlıq artıq uzunmüddətli xarakter daşıyır. Bu, təkcə bizim üçün deyil, təkcə qonşularımız üçün deyil, həm də geniş bir coğrafiya üçün strateji əhəmiyyətə malikdir”, - deyə deputat əlavə edib.
Bölmənin digər xəbərləri
