UEFA KUBOKU TARİXİNDƏ SONUNCU FİNAL GÖRÜŞÜ
Bakı, 20 may (AZƏRTAC). AFFA-nın saytı xəbər verir ki, qurumun baş katibi Elxan Məmmədov UEFA Kuboku yarışlarının final görüşünü izləyəcəkdir. Xatırladaq ki, mayın 20-də İstanbulun “Şükrü Saracoğlu” stadionunda Almaniyanın “Verder” və Ukraynanın “Şaxtyor” klubları arasında UEFA Kuboku tarixində sonuncu final qarşılaşması olacaqdır.
“Verder” Avropanın daha təcrübəli klubu olsa da, bu görüşün favoriti “Şaxtyor” sayılır. Əsas səbəb “Verder”in üzləşdiyi ciddi kadr itkiləridir. Bremenlilərin lideri, braziliyalı yarımmüdafiəçi Diyeqonun aldığı sarı vərəqələrin sayı çox olduğu üçün o, oyuna buraxılmayacaqdır. “Verder”in aparıcı mərkəz müdafiəçisi Per Mertezaker isə zədələnmişdir. Bundan əlavə, hücumçu Huqo Almeyda da yarışdan məhrum edilmişdir. Doğrudur, sonuncunun görüşdə iştirak etməməsi klub üçün Diyeqo və Mertezaker qədər ağır itki olmayacaqdır, lakin bremenlilərin məşqçisi Tomas Şaafın müxtəlif taktiki variantlarını azaldacaqdır. 10-cu yerdə qərarlaşmaqla, artıq çoxdan Almaniya çempionatında həlledici rol oynamayan “Verder”in üstünlüyü isə komandanın məhz İstanbul finalına məqsədyönlü hazırlaşmaq imkanının olmasındadır.
Elə “Şaxtyor” da oxşar vəziyyətdədir. Mirçi Luçeskunun komandası mövsüm başlanandan xeyli xal itirdiyi üçün Ukraynanın ən yaxşı komandası vaxtından əvvəl Kiyev dinamoçuları sayılmışdır. İkinci yer və Çempionlar Liqasına vəsiqə qazanmaq uğrunda Xarkovun “Metallist” komandasını geridə qoyan “Şaxtyor” da diqqətini yalnız Avropa yarışlarına yönəltmişdir. Ukrayna klubunun heyətlə bağlı problemi yoxdur. Mərkəz müdafiəçisi Tomaş Xyubşmanın oynamaması əvəzsiz itkiyə bənzəmir. Elə oyunçuların özləri də almanları əlverişli rəqib sayırlar.
Bölmənin digər xəbərləri
