Ukrayna Prezidenti Pokrovsk və Kupyanskda döyüşlərə dair son vəziyyətə aydınlıq gətirib
Kiyev, 30 oktyabr, AZƏRTAC
Kupyanskda vəziyyət gərgin olaraq qalır. Ancaq ukraynalı müdafiəçilər indi daha çox nəzarətə sahibdirlər.
AZƏRTAC xəbər verir ki, bu barədə Ukrayna Prezidenti Volodimir Zelenski axşam müraciətində məlumat yayıb.
Dövlət başçısı Ukrayna Silahlı Qüvvələrinin Baş Komandanı Aleksandr Sırski və Ukrayna Silahlı Qüvvələrinin Baş Qərargah rəisi Andrey Qnatov ilə cəbhədəki vəziyyətlə bağlı ətraflı müzakirələr apardığını deyib. Bütün cəbhə xəttindəki vəziyyət müzakirə edilib.
Zelenskinin sözlərinə görə, ən çətin vəziyyət döyüşlərin ən yüksək intensivliyinin qaldığı Pokrovsk istiqamətindədir. Çoxlu sayda işğalçı orada cəmləşib.
Prezident aydınlaşdırıb ki, ruslar istənilən vasitə ilə Pokrovsk istiqamətində mövqelərini möhkəmləndirməyə çalışır və orada öldürülən hər bir rus əsgəri bütün Ukrayna üçün xeyirdir.
Zelenski bildirib ki, Sırski və Qnatovla uzun məsafəli əməliyyatların planlaşdırılmasını ətraflı müzakirə edib. Hazırda yeganə variant Rusiyanı müharibəni dayandırmağa məcbur etməkdir. Buna sülh sanksiyaları və Ukraynanın uzun məsafəli zərbələri vasitəsilə nail olmaq olar.
“Həmçinin mühüm məsələ Ukraynanın Rusiyanın zərbələrindən sonra bərpası və tərəfdaşlarla koordinasiyadır”, - deyə Prezident vurğulayıb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
