MƏDƏNİYYƏT
Ukraynada 28 may - Respublika Günü münasibətilə onlayn konsert keçirilib VİDEO
Kiyev, 19 may, AZƏRTAC
Müslüm Maqomayev adına Mədəniyyət Mərkəzinin təşkilatçılığı ilə Ukraynada 28 may-Respublika Günü münasibətilə onlayn konsert keçirilib.
Onlayn konsertdə mərkəzinin rəhbəri, Ukraynanın Xalq artisti Qurban Abbasov, ukraynalı aktrisa, müğənni Natalya Kudryaşova Azərbaycanın klassik və bəstəkar mahnılarını səsləndiriblər. Həmçinin mərkəzin nəzdində fəaliyyət göstərən rəqs qrupu Azərbaycanın milli musiqisini ifa edib.
Bəstəkarlarımızın mahnılarının Ukrayna dilində səsləndirilməsi, Azərbaycanın milli rəqs nömrələri konserti onlayn izləyən tamaşaçılar tərəfindən alqışlarla qarşılanıb.
Azərbaycan musiqisinin təbliğinin önəmindən danışan Q.Abbasov AZƏRTAC-a bildirib ki, karantin dövründə onlayn konsertlər davam etdiriləcək. O, karantindən sonra Ukraynanın digər bölgələrində də konsertlərin keçiriləcəyini vurğulayıb.
Onlayn konsertin media dəstəyini AZƏRTAC həyata keçirib.
Emil Hüseynli
AZƏRTAC-ın xüsusi müxbiri
Kiyev