Ukraynada koronavirusa yoluxma halları yenidən kəskin artıb

03.06.2020 [11:28]
Çap et
A⁺ A^-

Kiyev, 3 iyun, AZƏRTAC

Ukraynada koronavirusa yoluxma halları yenidən kəskin artıb. AZƏRTAC ölkənin Səhiyyə Nazirliyinə istinadla xəbər verir ki, son sutkada Ukraynada 483 nəfər koronavirusa yoluxub, 8 nəfər isə ölüb, 362 xəstə tam müalicə olunaraq evə buraxılıb.

Bununla da Ukraynada koronavirusa yoluxanların sayı 24 min 823 nəfərə çatıb. Bu virusdan ölənlərin sayı 735 nəfərdir. Ölənlərin 85 faizində ürək-damar, şəkərli diabet, böyrək çatışmazlığı kimi xəstəliklər olub. Yoluxanlardan 10078-i müalicə olunaraq evlərinə buraxılıb.

Qeyd edək ki, ölkədə iyunun 22-dək karantin rejimi elan olunub. Mayın 11-dən isə karantin rejiminin yumşaldılması tədbirləri həyata keçirilir.

Emil Hüseynli

AZƏRTAC-ın xüsusi müxbiri

Kiyev