SİYASƏT
Ulu Öndər Heydər Əliyevin xatirəsi Gürcüstanın bölgələrində də anılıb
Tbilisi, 13 dekabr, AZƏRTAC
Azərbaycan xalqının Ümummilli Lideri Heydər Əliyevin vəfatının 21-ci ildönümü ilə əlaqədar Gürcüstanın bölgələrində anım tədbirləri keçirilib.
AZƏRTAC xəbər verir ki, Marneulidə Gürcüstan Azərbaycanlılarının İnteqrasiya Mərkəzində (GAİM) keçirilən anım tədbirində Ulu Öndərin xatirəsi bir dəqiqəlik sükutla yad edilib.
Sonra GAİM-in icraçı direktoru Murad Muradov gənclərə Ulu Öndərin həyatı və fəaliyyəti, Gürcüstan-Azərbaycan münasibətlərinin inkişafındakı rolu, Gürcüstanda yaşayan soydaşlarımıza doğma münasibəti barədə məlumat verib.
Sonda Ümummilli Lider Heydər Əliyevin həyatından bəhs edən sənədli film nümayiş etdirilib.
Bolnisidəki “Qafqaz Hüquq və İnteqrasiya Mərkəzi”nin təşkilatçılığı ilə “Dahi Şəxsiyyət Qəlblərdə” adlı anım tədbiri keçirilib.
Tədbir Ulu Öndərin xatirəsinin bir dəqiqəlik sükutla yad edilməsi ilə başlayıb. Mərkəzin rəhbəri Rezo Həsənov Dahi Şəxsiyyət Heydər Əliyevin həyat və fəaliyyətindən danışıb.
Tədbir “Xalq Heydər Deyəcək” adlı video süjetin nümayişi ilə başa çatıb.
Qardabani Təhsil və İnteqrasiya Mərkəzində də Azərbaycan xalqının Ümummilli Lideri Heydər Əliyevin xatirəsi anılıb.
Mərkəzin Azərbaycan dili və ədəbiyyat müəllimi Sevda Şahverdiyeva şagirdlərə Heydər Əliyevin zəngin və mənalı ömür yolu, həyat və fəaliyyətinə dair açıq dərs keçib.
Sonra Mərkəzin üzvləri Rustavi şəhərində yerləşən Ümummilli Liderin abidəsini ziyarət ediblər.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
