Umud Mirzəyev: İkinci Qarabağ Zəfəri dövlət və cəmiyyət birliyinin təntənəsidir
Bakı, 8 noyabr, AZƏRTAC
İkinci Qarabağ müharibəsində qazanılan Zəfərin 5 illiyinin qeyd olunduğu bu günlərdə Azərbaycan xalqı öz tarixinin ən parlaq mərhələsini yaşayır. Azərbaycanın son illərdə keçdiyi inkişaf yolu təkcə iqtisadi göstəricilərlə deyil, həm də milli həmrəylik, dövlət–cəmiyyət münasibətlərində formalaşan yeni siyasi və mədəni dəyərlərlə seçilir. Qarabağ Zəfəri, Böyük Qayıdış prosesi və postmünaqişə dövründə sülh gündəliyinin inkişafı Prezident İlham Əliyevin liderliyi ilə əldə edilmiş ən mühüm tarixi nailiyyətlərdir. Bu proseslər milli kimliyin, siyasi iradənin və vətəndaş məsuliyyətinin təntənəsi kimi dəyərləndirilir.
Bu sözləri AZƏRTAC-a açıqlamasında Beynəlxalq Avrasiya Mətbuat Fondunun prezidenti Umud Mirzəyev söyləyib.
O bildirib ki, Azərbaycanın vətəndaş cəmiyyəti təşkilatları Prezident İlham Əliyevin siyasətinə tam dəstək verir, onu həm müharibənin qalibi, həm də sülhün müəllifi kimi qiymətləndirirlər. "Qarabağ həqiqətlərinin beynəlxalq ictimaiyyətə çatdırılması, humanitar mina təmizlənməsi təşəbbüsləri, şəhid ailələri və qazilərə dəstək, sosial adaptasiya layihələri, Böyük Qayıdış prosesində ictimai iştirakçılıq və nəzarət, bütün bunlar QHT-lərin artıq proseslərin fəal tərəfdaşına çevrildiyini göstərir. Bu, dövlət və vətəndaş cəmiyyəti arasında etimada əsaslanan əməkdaşlığın formalaşdığını təsdiqləyir.
Prezident İlham Əliyevin tarixi rolu bu gün həm də milli strateji düşüncənin möhkəmlənməsi ilə dəyərləndirilir. Onun rəhbərliyi ilə Azərbaycan 30 ilə yaxın davam edən işğala son qoydu, ərazi bütövlüyünü bərpa etdi və bölgədə yeni geosiyasi reallıq yaratdı. O, Azərbaycanı qələbədən-qələbəyə aparan lider kimi qəbul olunur. Lakin bu liderlik yalnız müharibə ilə məhdudlaşmayıb – sülh təşəbbüslərinin, regional inteqrasiya ideyalarının və davamlı inkişaf strategiyalarının müəllifi kimi də tanınır",-deyə U. Mirzəyev vurğulayıb.
QHT sədri əlavə edib ki, “Böyük Qayıdış” proqramı nəticəsində qısa müddətdə 6 şəhər, 2 qəsəbə və 20-dən çox kənd yenidən inşa edilib, 60 minə yaxın insan doğma yurduna qayıdıb. “Ağıllı şəhər”, “yaşıl enerji”, müasir kommunikasiya infrastrukturu, sosial xidmətlər və digər layihələr dünyada bənzəri az olan post-münaqişə modelinin tərkib hissəsidir. Bu prosesdə QHT-lər sosial monitorinq, ictimai diplomatiya, beynəlxalq əməkdaşlıq və sosial proqramların icrasında mühüm rol oynayırlar. Bu mərhələnin diqqətçəkən xüsusiyyətlərindən biri dövlətlə vətəndaş cəmiyyəti institutları arasında formalaşmış yeni əməkdaşlıq modelidir. Bu gün QHT-lərə Dövlət Dəstəyi Agentliyi bu modelin mərkəzində dayanır və QHT-lərlə dövlət qurumları arasında dialoqu institusional səviyyəyə daşımaq funksiyasını yerinə yetirir. QHT-lərin fəaliyyəti artıq daha şəffaf maliyyələşmə, açıq layihə müsabiqələri, beynəlxalq tərəfdaşlıqlar və idarəetmə standartlarının tətbiqi ilə inkişaf etdirilir. Dövlət ilk dəfə olaraq vətəndaş cəmiyyətini yalnız müşahidəçi və ya tənqidçi struktur kimi deyil, real tərəfdaş kimi qəbul edir.
Bu əməkdaşlığın nəticəsi kimi Azərbaycan QHT-lərinin regional və beynəlxalq arenadakı mövqeyi də möhkəmlənib. Son illərdə yaradılan Qlobal Cənub QHT Platforması, müxtəlif tematik koalisiyalar və beynəlxalq şəbəkələr Azərbaycanın səsini yeni formalarda dünyaya çatdırır. Bu platformalar vasitəsilə Azərbaycan QHT-ləri mina təhlükəsi, post-münaqişə reabilitasiyası, mədəni irsin qorunması və sülh təşəbbüsləri sahəsində beynəlxalq proseslərin fəal iştirakçısına çevriliblər.
Xüsusilə ötən ay Xankəndidə keçirilən QHT-lərin Əməkdaşlıq Forumu Azərbaycanın suverenliyinin, ərazi bütövlüyünün və dövlət–cəmiyyət birliyinin yeni reallıqda təsdiqi kimi tarixi əhəmiyyət daşıdı. Vətəndaş cəmiyyəti uzun illər Qarabağ məsələsini beynəlxalq tribunalardan səsləndirirdisə, indi artıq həmin həqiqətləri məhz Xankəndidə – azad olunmuş torpaqlarda ifadə edir. Bu Forum eyni zamanda vətəndaş cəmiyyəti üçün yeni məsuliyyət mərhələsinin başlanğıcıdır. Qarabağda bərpa, reinteqrasiya, mina təhlükəsizliyi, sosial adaptasiya və humanitar dəstək proseslərində QHT-lərin rolu daha da artır.
“Hazırkı mərhələ təkcə qələbənin emosiyası deyil, onun məsuliyyətini daşıyan cəmiyyət modelinin formalaşması dövrüdür. Bu, dövlət və cəmiyyətin birlikdə yazdığı yeni tarixdir. QHT-lər bu tarixi dönüşün həm iştirakçıları, həm də yaddaş daşıyıcılarıdır. Prezident İlham Əliyevin “Biz təkcə torpaqlarımızı deyil, ləyaqətimizi və milli qürurumuzu da geri qaytardıq” fikri bu gün hər bir azərbaycanlının düşüncəsində yeni mərhələnin simvoluna çevrilib. Bu mərhələnin davamlılığı üçün dövlət və vətəndaş cəmiyyəti əvvəlkindən daha sıx həmrəy olmalı, əldə olunan qələbəni qalıcı sülhə, inkişaf və gələcək nəsillərə ötürüləcək milli mirasa çevirməlidir”,-deyə Umud Mirzəyev bildirib.
Bölmənin digər xəbərləri
