Ümumrusiya Azərbaycanlılar Konqresi Rusiya Günü bayramı münasibətilə qəbul təşkil etmişdir
Moskva, 13 iyun (AZƏRTAC). Moskvada Rusiya Günü şərəfinə təntənəli gecə olmuşdur. Gecəni Ümumrusiya Azərbaycanlılar Konqresi (ÜAK), Rusiya-Azərbaycan Dostluq Cəmiyyəti və Nikolay Baybakov Fondu təşkil etmişlər.
ÜAK-ın icraçı direktoru İlqar Hacıyev tədbiri açaraq bildirmişdir ki, Rusiya Günü sözün əsl mənasında milli birlik günüdür. Öz ölkəsinə məhəbbət, onun gələcək uğurlarına əminlik hissi bu torpaqda yaşayanları bütün çətinliklərin öhdəsindən gəlməyə qadir olan vahid xalqa çevirir. Natiq demişdir: “Biz çox fərqliyik, lakin hamımızı zəngin keçmişi və işıqlı gələcəyi olan bir ölkədə - Rusiyada yaşamağımız birləşdirir. Son on ildə bu ölkə həm daxili, həm də xarici siyasətdə sanballı uğurlar qazanmışdır. Rusiya azərbaycanlıları ölkələrimizin əsrlərə söykənən qardaşlıq əlaqələrinə qayğı ilə yanaşırlar. Ölkələrimiz arasında münasibətlər günbəgün möhkəmlənir”.
ÜAK-ın nümayəndəsi, professor Manaf Ağayev qeyd etmişdir ki, müasir ruslar və azərbaycanlılar vaxtilə yaşayıb-yaratmış, mədəni əlaqələrlə bərabər Rusiya-Azərbaycan münasibətləri qurmuş nəsillərin nümayəndələridir. Azərbaycan Prezidenti İlham Əliyevin Rusiya Günü münasibətilə Rusiya Prezidenti Vladimir Putinə ünvanladığı təbrik teleqramında deyilir ki, ikitərəfli münasibətlərimiz xalqlarımızın rifahı, sülhün möhkəmlənməsi və inkişafı naminə bundan sonra da möhkəmlənəcək və inkişaf edəcəkdir.
Sonra RF XİN-in MDB ölkələri üzrə 4-cü Departamentinin şöbə müdirinin müavini Vladimir Seryoqin vurğulamışdır ki, “suveren dövlətlərdə yaşasaq da, əvvəlkitək vahid humanitar məkanda yerləşirik”. Sevindirici haldır ki, tədbirin təşkilatçıları Rusiya Gününün bayram edilməsinə belə diqqətlə yanaşmışlar. Rusiyada 130-dan çox millətin nümayəndəsi yaşayır. Hər bir millətin inkişaf etmək və öz milli identikliyini möhkəmləndirmək imkanı vardır. Bu gün Rusiyadakı azərbaycanlılar dolğun həyat yaşayır və ölkənin inkişafına töhfə verirlər.
Gecədə “Voprosı istorii” jurnalının baş redaktoru Əhməd İsgəndərov, ÜAK-ın Rəyasət Heyətinin üzvü, MDU-nun tarix fakültəsinin dosenti İsmayıl Ağakişiyev, Baybakov Fondunun nümayəndəsi, Rusiyanın Neft-Qaz Sənayeçiləri İttifaqının prezidenti Gennadi Şmal, Rusiya Jurnalistlər İttifaqının katibi Rafael Hüseynov, Rusiyanın MDB İşləri, Xaricdə Yaşayan Həmvətənlər və Beynəlxalq Humanitar Əməkdaşlıq üzrə Federal Agentliyinin Həmvətənlərin İşləri və İctimai Diplomatiya İdarəsi rəisinin müavini Həmzət Həmzətov və başqaları çıxış etmişlər.
Gecədə ÜAK-ın Rusiya Günü bayramı şərəfinə təşəkkürnamələri təqdim edilmişdir.
Fəridə Abdullayeva
AZƏRTAC -ın xüsusi müxbiri
Moskva
Bölmənin digər xəbərləri
