“Universal və milli dəyər fəlsəfəsinin tətbiqi problemləri” - beynəlxalq elmi konfrans
Bakı, 19 noyabr, AZƏRTAC
AMEA-nın Fəlsəfə və Sosiologiya İnstitutunda Ümumdünya Fəlsəfə Gününə həsr olunmuş “Universal və milli dəyər fəlsəfəsinin tətbiqi problemləri” mövzusunda beynəlxalq elmi konfrans keçirilib.
İnstitutdan AZƏRTAC-a bildirilib ki, konfransda Azərbaycan alimləri ilə yanaşı, Türkiyə, Böyük Britaniya və ABŞ-dan (onlayn) olan alim və mütəxəssislər iştirak ediblər.
Tədbiri açan institutun direktoru fəlsəfə elmləri doktoru, professor İlham Məmmədzadə hər il ənənəvi olaraq keçirilən konfransın əhəmiyyətindən danışıb. Bu gün münasibətilə hər il Azərbaycanda fəlsəfə elminin inkişafına töhfə verən beynəlxalq konfransların təşkil edildiyini bildirən İ.Məmmədzadə fəlsəfə elminin öyrənilməsinin, fəlsəfi biliklərin cəmiyyətin mənəvi saflığının və sabitliyin qorunmasındakı rolundan danışıb və maarifçiliyin geniş inkişaf etdirilməsində fəlsəfənin rolunun zəruriliyini də vurğulayıb.
Professor qeyd edib ki, Akademiyanın 80 illiyi ilə bağlı keçirilən tədbirdə Prezident İlham Əliyev elmin inkişafında süni intellekt və rəqəmsal texnologiyaların tətbiqinin əhəmiyyətindən danışıb, bu istiqamətin ölkələrin gələcək inkişafında mühüm rol oynadığını bildirib. Dövlətimizin başçısı Azərbaycan dilinin saflığının qorunmasının milli məsələ olduğunu qeyd edib və hər bir vətəndaşın bu işə məsuliyyətlə yanaşmalı olduğunu deyib.
Fəlsəfə və ideologiya haqqında danışan professor İlham Məmmədzadə fəlsəfəni ideologiyasız və ideologiyanı da fəlsəfəsiz təsəvvür etməyin mümkün olmadığını bildirib.
Tədbirdə çıxış edən akademik Gövhər Baxşəliyeva Fəlsəfə Günü münasibətilə konfrans iştirakçılarını təbrik edib, konfransın əhəmiyyətindən danışaraq institutun alimlərinə elmi fəaliyyətlərində uğurlar diləyib. O, Prezident İlham Əliyevin Azərbaycan Milli Elmlər Akademiyasının 80 illik yubiley yığıncağındakı nitqində Azərbaycan elmi və aliminə yüksək dəyər verməklə yanaşı, Azərbaycan elmi qarşısında qoyduğu vəzifədən danışıb. Dövlətimizin başçısının nitqində Azərbaycan dili və tarixi ilə bağlı alimlərə xüsusi tapşırıqların öz əksini tapdığını deyən akademik Gövhər Baxşəliyeva Prezidentin vurğuladığı əsas məqamlar kimi, Azərbaycan tarixinin daha doğru və elmi şəkildə tədqiqinin, Azərbaycan dilinin saflığının qorunmasının labüdlüyünü vurğulayıb.
Tədbirdə Fəlsəfə və Sosiologiya İnstitutunun şöbə müdiri AMEA-nın müxbir üzvü Könül Bünyadzadə “AMEA-nın prioritetlərində fəlsəfə”, Qalatasaray Universitetinin professoru Paul Ballanfat və Hafssa Bekhelouf “Fəlsəfənin milliliyi”, Böyük Britaniya Kral Cəmiyyətinin üzvü, beynəlxalq politoloq Niel Watson “Qlobal çağırışlar dövründə ümumbəşəri və xüsusi dəyərlərin kəsişməsinin fəlsəfi konteksti”, Fəlsəfə və Sosiologiya İnstitutunun elmi işlər üzrə direktor müavini tarix elmləri doktoru Eynulla Mədətli “Tarixin fəlsəfəsi və dəyərlərə münasibət”, professor Patrik Uolş “Milli özünüdərkin humanist dünya nizamının formalaşmasındakı rolu” mövzularında məruzə ediblər. Həmçinin professor Əbülhəsən Abbasovun “Bakıdan dünyaya yayılmış dəyər Q.S.Altşuller nəzəriyyəsi və məktəbi”, professor Rəna Mirzəzadənin “Suveren Azərbaycanda universal dəyərlər: siyasi-hüquqi komponentlər”, fəlsəfə elmləri doktoru Füzuli Qurbanovun “Suverenlik fəlsəfəsi haqqında: Azərbaycan konteksti”, dosent Məhəmməd Cəbrayılovun “Rəqəmsal imperializm və milli suverenliyin qorunması problemi” mövzularında məruzələri dinlənilib. Bundan əlavə, dosent Şölət Zeynalov “Elmi-texniki tərəqqi və dəyərlər problemi”, fəlsəfə üzrə fəlsəfə doktoru Zaur Rəşidov “Mirzə Şəfi Vazehin nəğmələrinin Almaniyada Märzrevolution sonrası proseslərə təsiri”, professor Azər Mustafayev “AMEA xalqımızın və dövlətimizin zəngin sərvətidir” mövzularında çıxış ediblər. Texnika elmləri üzrə fəlsəfə doktoru Heydər İmanov isə Fəlsəfə Günü münasibətilə fikirlərini bölüşüb.
Bölmənin digər xəbərləri
