Universiada: Qılıncoynatmanın sablya və şpaqa növləri üzrə şəxsi yarışlarda mübarizəyə start verilib
Essen, 17 iyul, AZƏRTAC
Almaniyanın Reyn-Ruhr regionunda keçirilən 32-ci Ümumdünya Yay Universiadasında qılıncoynatmanın sablya və şpaqa növləri üzrə şəxsi yarışlarda mübarizəyə start verilib.
AZƏRTAC xəbər verir ki, qız şpaqaçılarımızdan Aynur Quliyeva (4 qələbə) və Nazilə Rəhimova (3 qələbə) qrup mərhələsini uğurla adlayaraq pley-offa yüksəlib. Qrupda 1 qələbəsi olan Xədicə Həsənli mübarizəni dayandırıb. Nazilə Rəhimova ən güclü 32-liyə yüksəlmək uğrunda keçirilən qarşılaşmada neytral idmançı statusunda iştirak edən Polina Xaertdinovaya 13:15 hesabı ilə uduzub. Aynur Quliyeva isə belçikalı Anne Lieve Bultinkə 12:15 hesabı ilə məğlub olub.
Qız şpaqaçılarımız iyulun 20-də komanda yarışında mübarizə aparacaq.
Oğlan sablyaçıların şəxsi yarışında Maqsud Hüseynli, Saleh Məmmədov və Murad Əkbərov qüvvəsini sınayıb. Qrup mərhələsini bir qələbə ilə başa vuran Murad Əkbərov mübarizəni erkən dayandırıb. Hesabında 3 qələbə olan Saleh Məmmədov isə pley-offda Avstraliya təmsilçisi Arnav Rajaya 13:15 hesabı ilə uduzub.
Pley-offda honkonqlu rəqibi Hoi Çun Çanqı (15:13) mübarizədən kənarlaşdıran Maqsud Hüseynli ən güclü 16-lığa yüksəlmək üçün Qazaxıstan sablyaçısı Bexultan Abzhal ilə qarşılaşacaq.
Bölmənin digər xəbərləri
