UŞAQLAR DAİM DİQQƏT MƏRKƏZİNDƏDİR
AZƏRTAC xəbər verir ki, mayın 30-da Qaradağ Rayon İcra Hakimiyyətinin təşəbbüsü ilə Sahil qəsəbəsindəki Elçin Əzizov adına 301 nömrəli körpələr evi - uşaq bağçasında 1 İyun - Uşaqları Beynəlxalq Müdafiə gününə həsr olunmuş bayram şənliyi keçirilmişdir.
Şənlikdə rayon icra hakimiyyəti başçısının müavini Zemfira Şıxəliyeva çıxış edərək, uşaqlara təmiz səma altında xoşbəxt gələcək arzulamış, ulu öndərimiz Heydər Əliyevin uşaqlara həmişə diqqət və qayğı ilə yanaşdığını bildirmiş, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın bu istiqamətdə gördüyü mühüm işlərdən danışmışdır.
Şən klounlar bayram tədbirinə əlvanlıq gətirmişdir. Uşaqların söylədikləri şeir parçaları, ifa etdikləri mahnılar, balaca idmançıların nümunəvi çıxışları maraqla qarşılanmışdır. Bir sözlə, gələcəyimiz olan körpə balalarımızın bayram sevinci bütün gün davam etmişdir.
Bayram şənliyinə toplaşmış 150-dən çox fidan balanın üzündən xoşbəxtlik oxunurdu.
Bölmənin digər xəbərləri
