UŞAQLAR “VƏTƏN HARADAN BAŞLANIR” SUALINA CAVAB VERMİŞLƏR
AZƏRTAC xəbər verir ki, 28 May - Respublika günü münasibətilə Azərbaycanın dövlət himninin deklamasiya müsabiqəsi mayın 27-də Rəşid Behbudov adına Mahnı teatrında qaliblərin mükafatlandırılması ilə başa çatmışdır. Bakı Baş Gənclər və İdman İdarəsinin Baş Təhsil Şöbəsi ilə birgə təşkil etdiyi müsabiqə rayonlarda (1-ci mərhələ, aprel-may) və paytaxtda (2-ci mərhələ, 27 may) orta məktəb şagirdləri arasında iki mərhələdə keçirilmişdir. Bakı Baş Gənclər və İdman İdarəsinin rəisi Raqif Abbasov finalçıları salamlayaraq bildirmişdir ki, ölkəmizdə ilk dəfə keçirilən bu müsabiqə təkcə dövlət rəmzlərinə, o cümlədən dövlət himninə ehtiram əlaməti deyil, həm də “Haradan başlanır Vətən” sualına özünəməxsus cavabdır. Himnin mətni böyük əməllərə səsləyən vətənpərvərlik poeziyasıdır. Müsabiqəyə gəldikdə isə o, iştirakçılara Himnin poetik sətirlərini öz ifalarında eşitmək imkanı vermişdir.
Finalda 22 şagird iştirak etmişdir. Müsabiqənin şərtlərinə görə qaliblər diplomlar və pul mükafatları almışlar. Qızlar arasında birinci yeri Ləman Eyyubova (Binəqədi rayonu), ikinci yeri Fərəh Abdullayeva (Yasamal rayonu), üçüncü yeri Günel Dadaşova (Suraxanı rayonu) tutmuşlar.
Oğlanlar arasında Rəsul Tağıyev (Sabunçu rayonu) qalib gəlmişdir. İkinci yerə Valid Həsənov (Suraxanı rayonu), üçüncü yerə isə Nicat Əliyev (Qaradağ rayonu) layiq görülmüşlər.
Qaliblərə müvafiq olaraq 250, 150 və 100 manat məbləğində pul mükafatı təqdim olunmuşdur.
######
Bölmənin digər xəbərləri
