Vaseda Universitetinin azərbaycanlı magistri yaponiyalı məktəblilərə Azərbaycanla bağlı dərs keçəcəkdir
Tokio, 13 iyun (AZƏRTAC). Tokionun Vaseda Universitetinin magistri Emil Cəfərzadə “Ryuqakusey qa sensey“ (“Əcnəbi tələbə müəllimdir”) proqramı çərçivəsində yaponiyalı məktəblilərə Azərbaycan haqqında yapon dilində dərs keçəcəkdir.
Proqramın başlaması ilə bağlı təşkil edilmiş mərasimdə Azərbaycanın Yaponiyadakı səfiri Gürsel İsmayılzadə fəxri qonaq kimi iştirak etmişdir. Tələbə olarkən özünün də həmin proqrama qatıldığını və Azərbaycan Respublikası barəsində yaponiyalı məktəbliləri məlumatlandırdığını bildirən səfir bunun bir vətənpərvərlik işi olduğunu qeyd etmiş, müxtəlif ölkələrdən olan iştirakçılara mənsub olduqları ölkələri təbliğ etmək kimi şərəfli fəaliyyətlərində uğurlar arzulamışdır.
Vaseda Universitetinin beynəlxalq münasibətlər fakültəsində təhsilini davam etdirən Emil Cəfərzadə isə AZƏRTAC-ın xüsusi müxbirinə bildirmişdir ki, Yaponiyanın “Kokusay Rikay Şien Kyokay“ (Beynəlxalq qarşılıqlı anlaşmaya dəstək assosiasiyası) qeyri-hökumət təşkilatının proqramına qatılmaqda məqsədi sürətlə inkişaf edən Azərbaycan Respublikasını yaponiyalı məktəblilərə yaxından tanıtmaqdır. Azərbaycanla bağlı əyani vəsaitlərin - Dövlət Bayrağının, müxtəlif ədəbiyyatın, xəritələrin, CD və DVD-lərin əldə olunmasında göstərilmiş yardıma görə, Azərbaycanın Yaponiyadakı səfirliyinə minnətdarlığını bildirən E.Cəfərzadə bunlardan dərs zamanı səmərəli istifadə etməyə çalışacağını qeyd etmişdir. Xalqımızın qədim tarixə, zəngin mədəniyyətə, dahi şəxsiyyətlərə malik olduğunu bildirən magistr müstəqilliyin əldə edildiyi 20 ildə qazanılmış uğurlar barədə də yaponiyalı yeniyetmələri məlumatlandıracağını diqqətə çatdırmışdır.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
