CƏMİYYƏT
Vətən müharibəsində qazanılan böyük Zəfər Heydər Əliyev ideyalarının hazırda da yaşadığını sübut etdi
Bakı, 14 iyun, AZƏRTAC
1993-cü il iyunun 15-də Azərbaycan tarixində yeni, mütərəqqi dövrün əsası qoyulub. Həmin tarixdə Ulu Öndərin siyasi hakimiyyətə qayıdışı birmənalı şəkildə Azərbaycan dövlətçiliyinin, onun müstəqilliyinin xilası kimi qiymətləndirilir.
Bu fikirlər iyunun 14-də Müharibə, Əmək və Silahlı Qüvvələr Veteranları Təşkilatında Milli Qurtuluş Günü ilə bağlı keçirilən tədbirdə səsləndirilib.
Tədbirdə çıxış edən təşkilatın sədr müavini, polkovnik Cəlil Xəlilov Milli Qurtuluş Gününün dövlətçilik tariximiz baxımından əhəmiyyəti ilə bağlı geniş məruzə ilə çıxış edib. Vurğulayıb ki, həmin tarixə qədər respublikamızda vəziyyətin mürəkkəbliyi, müstəqilliyimiz və təhlükəsizliyimizlə bağlı açıq təhdidlər var idı. Bir tərəfdən genişlənməkdə olan erməni işğalı, məcburi köçkün problemi, digər tərəfdən ölkə daxilində çoxsaylı qanunsuz silahlı dəstələrin mövcudluğu, siyasi hakimiyyət uğrunda müxtəlif qruplar arasında aparılan mübarizə Azərbaycanın gələcəyi ilə bağlı vəziyyəti ümidsiz edirdi. Məhz belə mürəkkəb zamanda hakimiyyətə gələn Heydər Əliyev qısa zamanda xalqımızın və dövlətimizin həyatında ciddi dönüşə nail oldu. Ulu Öndərin səyi nəticəsində ölkə daxilindəki bütün qarşıdurmalara, xaos və özbaşınalığa son qoyuldu. Nizami ordunun formalaşması, siyasi müstəqilliyimizin möhkəmlənməsi, iqtisadiyyatımızın güclənməsi istiqamətində qəti və ardıcıl addımlar atıldı. Ümummilli Liderin əzmi və fədakarlığı sayəsində Azərbaycan xalqı onun müstəqilliyini, birliyini, gələcəyini təhdid edən təhlükələrdən xilas oldu. Məhz bu səbəbdən də Azərbaycan xalqı haqlı olaraq 15 iyun tarixini Milli Qurtuluş Günü adlandırır, Ulu Öndəri hər zaman böyük sevgi və ehtiram hissi ilə anır.
Müharibə, Əmək və Silahlı Qüvvələr Veteranları Təşkilatının sədri Fatma Səttarova Ulu Öndərin siyasi kursunun Prezident İlham Əliyev tərəfindən hazırda uğurla davam etdirildiyini diqqətə çatdırıb. O deyib ki, Heydər Əliyev Azərbaycan xalqının xilaskarı və əbədi lideridir. Məhz onun siyasi səriştəsi, cəsarəti və əzmi sayəsində dövlətimiz bütün çətinliklərdən uğurla çıxmağa nail oldu. Heydər Əliyevin layiqli davamçısı, dövlətimizin başçısı İlham Əliyevin rəhbərliyi ilə ordumuz Vətən müharibəsi nəticəsində torpaqlarımızı erməni işğalçılarından azad etdi, ölkəmizin ərazi bütövlüyü təmin olundu. Bu böyük zəfər bir daha sübut etdi ki, Heydər Əliyev ideyaları indi də yaşamaqdadır və Azərbaycan xalqı bu ideyalara sadiqdir.
Tədbirdə çıxış edən digər veteranlar Heydər Əliyevlə bağlı fikirlərini bölüşüb, xatirələrini dilə gətirib, Milli Qurtuluş Gününün tarixi önəmini qeyd ediblər.