VIII BEYNƏLXALQ “ŞƏRQ-QƏRB” KİNOFESTİVALI AÇILMIŞDIR
Açılış səhnələşdirilmiş tamaşa ilə başlandı: 1898-ci il – köhnə Bakı. Sahil parkı – rəngarəng kütlə: çadralı qadın siluetləri, çərkəzi geyimli kişilər, dəbdəbəli geyimli xanımlar... Burada Şərq ilə Qərb qovuşmuşdur. Paytaxtımız kinematoqrafın yaranmasının ilk çağlarında bu cür üslublaşdırılmış şəkildə təqdim olunmuşdu. Təqdimatı isə Qərbdə böyük şöhrət qazanmış “Əli və Nino” romanının qəhrəmanları şərh edirdilər... Budur, ekranda Azərbaycan kinosunun tarixindən kadrlar - qızıl fonddakı “Bismillah”, “Arşın mal alan”, “O olmasın, bu olsun” filmlərindən və digər lentlərdən parçalar göstərilir.
Bütün bunlar Rauf Sultanovun rəhbərliyi ilə caz orkestrinin ifasında musiqi ilə müşayiət olunurdu.
Mədəniyyət və turizm naziri Əbülfəs Qarayev Azərbaycan Prezidenti İlham Əliyevin təbrikini festival iştirakçılarına yetirərək dedi ki, dövlət başçısının tapşırığı ilə indi kinostudiyanın müasir avadanlıqla təchiz olunması, “Nizami” kinoteatrının təmiri üzrə böyük iş görülür, dövlət sifarişi ilə eyni vaxtda iki bədii film çəkilir.
Xalq yazıçısı, MDB və Baltikyanı Ölkələr Kinematoqrafçılar İttifaqları Konfederasiyasının sədri Rüstəm İbrahimbəyov indiki kinofestivalın proqramına daxil edilmiş filmlərin siyahısını açıqladı. O, festivalın təşkilində kömək göstərdiklərinə görə respublika hökumətinə, Azərbaycan Mədəniyyətinin Dostları Fonduna, mədəniyyət və turizm, gənclər və idman nazirliklərinə, “Azeurotel” şirkətinə təşəkkür etdi.
VIII beynəlxalq “Şərq-Qərb” kinofestivalı açıq elan olundu.
X X X
Qısa fasilədən sonra yaradıcı kollektivlə görüş və Oleq Səfərəliyevin “Əlvida, cənub şəhəri!” bədii filminə baxış keçirildi.
Bölmənin digər xəbərləri
