İDMAN
Vüqar Məmməd: Futbolçularda yüksəliş var
![Vüqar Məmməd: Futbolçularda yüksəliş var](/files/2019/1/1200x630/154891785046438231_1200x630.jpg)
Bakı, 31 yanvar, AZƏRTAC
Təlim-məşq toplanışında ən güclü komandaya qarşı oynadıq. Düşünürəm ki, bizə lazım olan taktiki oyun planına uyğun oyun nümayiş etdirdik.
AZƏRTAC xəbər verir ki, bu sözləri Antalyada təlim-məşq toplanışı çərçivəsində Rusiyanın “Dinamo-2” (Moskva) komandası ilə yoxlama oyunu keçirən 19 yaşadək futbolçulardan ibarət Azərbaycan yığmasının baş məşqçisi Vüqar Məmməd deyib.
Mütəxəssis bildirib ki, bütün futbolçulardan razı qaldım. Bizə məhz belə sürətli, yüksək tempə uyğun oyunlar lazımdır. İstər fiziki, istərsə də taktiki planda rəqibdən geri qalmadıq. Meydanda məşqlərdə çalışdığımız tapşırıqları yerinə yetiririk. Futbolçularda yüksəliş var. Futbolçuların çoxu başqa ölkə komandalarının transfer siyahısına düşüb. Həqiqətən onlar gördükləri işə görə buna layiqdirlər.
Rusiyanın “Dinamo-2” komandası ilə qarşılaşma 0:0 hesablı heç-heçə ilə başa çatıb.
Millimiz hazırlıq prosesi çərçivəsində keçirdiyi yoxlama oyunlarında Küveytin U-19 yığması və Rusiyanın “Krasnodar-3” komandası ilə heç-heçə oynayıb - 1:1.