WUF13: Vətəndaş iştirakı dayanıqlı şəhərlərin əsas şərti kimi dəyərləndirilib
Bakı, 20 may, AZƏRTAC
Bakıda davam edən BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində “Vətəndaşların iştirakı və strateji ünsiyyət vasitəsilə şəhər davamlılığının gücləndirilməsi” mövzusunda tədbir keçirilib.
AZƏRTAC xəbər verir ki, Milli Müdafiə Universitetinin nəzdində fəaliyyət göstərən Bakı Hərbi Kollecinin müəllimi Törəxanım Nəsrullayevanın təqdimatı əsasında keçirilən tədbirdə kommunikasiya və vətəndaş iştirakının dayanıqlı şəhərlərin formalaşmasındakı rolu müzakirə olunub.
Çıxış edən T.Nəsrullayeva bildirib ki, kommunikasiya yalnız təhsil və institusional fəaliyyət üçün deyil, həm də etimadın, ictimai iştirakçılığın və dayanıqlı şəhər icmalarının qurulması baxımından mühüm əhəmiyyət daşıyır. O vurğulayıb ki, kommunikasiya olmadan əməkdaşlıq və qarşılıqlı etimadın inkişafı mümkün deyil.
Tədbirdə “Bakı Ağ Şəhər” layihəsinə dair videoçarx nümayiş olunub. Bildirilib ki, layihə təkcə şəhərlərin fiziki yenilənməsini deyil, eyni zamanda, onların insanyönümlü, dayanıqlı və gələcəyə davamlı prinsiplər əsasında planlaşdırılmasının vacibliyini ortaya qoyur. Diqqətə çatdırılıb ki, hazırda dünyada 1,1 milyarddan çox insan qeyri-adekvat yaşayış şəraitində yaşayır və urbanizasiya iştirakçı idarəetmə mexanizmlərindən daha sürətlə inkişaf edir. Bu baxımdan kommunikasiya və vətəndaş iştirakının əhəmiyyəti xüsusi vurğulanıb.
T.Nəsrullayeva qeyd edib ki, vətəndaşların qərarvermə prosesində iştirakı şəhər siyasətlərinin keyfiyyətini artırır və daha inklüziv idarəetməyə şərait yaradır. Onun sözlərinə görə, rəqəmsal kommunikasiya alətləri, icma iştirakçılığı modelləri və məlumatlara əsaslanan qərarvermə mexanizmləri hökumətlərlə vətəndaşlar arasında daha şəffaf və operativ əlaqələrin qurulmasına imkan verir.
Çıxış zamanı Sinqapur və Estoniya nümunələrinə toxunularaq, rəqəmsal idarəetmə sistemlərinin vətəndaş iştirakını və ictimai etimadı gücləndirdiyi bildirilib.
Tədbirdə iştirakçılarla interaktiv müzakirələr aparılıb, mənzil siyasəti və şəhərsalma qərarlarında rəqəmsal kommunikasiya vasitələrinin rolu ətrafında fikir mübadiləsi həyata keçirilib.
Sonda vurğulanıb ki, dayanıqlı şəhərlərin qurulması üçün vətəndaşların qərarvermə prosesində fəal iştirakı və kommunikasiya sistemlərinə investisiyaların artırılması vacibdir.
Tədbir sual-cavab sessiyası ilə davam edib.
Fotoqraf - Azər İbrahimov
Bölmənin digər xəbərləri
