XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Fevralın 1-də Azərbaycan Respublikasının xarici işlər naziri Vilayət Quliyev Çin Xalq Respublikasının Bakıdakı səfiri Cjan Qotsyanı ölkəmizdəki diplomatik fəaliyyətinin başa çatması ilə əlaqədar qəbul etmişdir.
Cənab Cjan Qotsyan Azərbaycanda işlədiyi müddətdə ona göstərilmiş köməyə və səmərəli əməkdaşlığa görə nazirə minnətdarlığını bildirmiş, ölkələrimiz arasında əlaqələrin bundan sonra da genişlənəcəyinə ümid etdiyini söyləmişdir. Səfir Dağlıq Qarabağ probleminə toxunaraq, bu münaqişənin beynəlxalq birliyin səyləri nəticəsində tezliklə sülh yolu ilə həll olunacağına ümid etdiyini vurğulamışdır.
V. Quliyev ölkələrimizin əlaqələrinin genişlənməsi sahəsində səfirin rolunu yüksək qiymətləndirmiş və ikitərəfli münasibətlərin gələcək perspektivlərinə böyük əhəmiyyət verdiyini, qarşılıqlı surətdə faydalı əməkdaşlığın davam etdirilməsinə tərəfdar olduğunu bildirmişdir.
Nazir səfirə gələcək fəaliyyətində uğurlar arzulamışdır.
Bölmənin digər xəbərləri
