XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Yanvarın 8-də Azərbaycan Respublikasının xarici işlər naziri Vilayət Quliyev Bakıda konsulluq məsələləri üzrə məsləhətləşmələrdə iştirak edən Türkiyə Respublikasının xarici işlər nazirliyinin konsulluq baş idarəsinin rəisi Umur Apaydını və onun rəhbərlik etdiyi nümayəndə heyətini qəbul etmişdir.
Qonağı səmimi salamlayan Vilayət Quliyev Türkiyə ilə Azərbaycan arasındakı dostluq münasibətlərinin və işgüzar əlaqələrin möhkəmlənməsi və genişlənməsini yüksək qiymətləndirmişdir. Daha sonra nazir Vilayət Quliyev iki ölkə vətəndaşlarının maneəsiz gediş-gəlişinin tənzimlənməsi sahəsində görülən işlərin, dövlətlər arasındakı münasibətlərin daha da sıx inkişafı üçün böyük əhəmiyyət kəsb etdiyini bildirmişdir.
Türkiyə respublikasının xarici işlər nazirliyinin konsulluq baş idarəsinin rəisi Umur Apaydın Azərbaycana gəlişindən məmnunluq duyduğunu bildirərək, müstəqillik əldə etdikdən sonra qısa müddət ərzində Azərbaycanın demokratik dəyərlərə inteqrasiyasını yüksək qiymətləndirmişdir. Söhbət zamanı Vilayət Quliyev və Umur Apaydın Türkiyə və Azərbaycan XİN-nin konsulluq idarələri arasındakı sıx əməkdaşlığın davam etdirilməsinə tərəfdar olduqlarını bildirərək, konsulluq məsələləri sahəsində fəaliyyətin əlaqələndirilməsinin vacibliyini vurğulamışlar.
Bölmənin digər xəbərləri
