XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Fevralın 9-da Azərbaycan Respublikasının xarici işlər naziri Vilayət Quliyev Yunanıstan Respublikasının parlamentinin üzvü xanım Sofiya Kalantzakosu qəbul etmişdir.
Görüş zamanı nazir Vilayət Quliyev və Sofiya Kalantzakos Yunanıstan ilə Azərbaycan arasındakı münasibətlərin inkişafına və əlaqələrin genişlənməsinə dair ətraflı fikir mübadiləsi aparmışlar.
Sofiya Kalantzakos səfərin məqsədini açıqlayaraq, 2004-cü ildə Yunanıstanda keçiriləcək növbəti olimpiya oyunları ilə əlaqədar, Yunanıstanın xarici işlər nazirinin təşəbbüsü ilə həmin ildə bütün dünyada mövcud olan münaqişələrin dayandırılmasını və barışıq ili elan edilməsini bildirmişdir.
Öz növbəsində ölkəmizin xarici siyasət idarəsinin başçısı Vilayət Quliyev Sofiya Kalantzakosun Azərbaycana səfərini yüksək qiymətləndirərək, Azərbaycan tərəfinin bu təklifə qoşulduğunu bildirmiş və 2004-cü ildə Yunanıstanda keçiriləcək Olimpiya Oyunları zamanı bütün münaqişə və müharibələrin dayandırılması haqqında bəyannaməni imzalamışdır.
Görüşdə qarşılıqlı maraq doğuran bir sıra məsələlər də müzakirə olunmuşdur.
Bölmənin digər xəbərləri
