“XƏMSƏ” İNTELLEKTUAL OYUNU ÜZRƏ AZƏRBAYCAN ÇEMPİONATININ AÇILIŞ MƏRASİMİ OLMUŞDUR
Bakı, 24 may (AZƏRTAC). Mayın 23-də Bakı Əyləncə Mərkəzində “Xəmsə” milli intellektual oyunu üzrə ikinci ölkə çempionatının final mərhələsinin rəsmi açılış mərasimi olmuşdur.
Tədbirdə gənclər və idman nazirinin müavini İntiqam Babayev bildirmişdir ki, əsas məqsəd ənənəvi bir oyuna çevrilmiş bu yarışın cəmiyyətdə geniş təbliğ edilməsi, gənclər tərəfindən sevilməsidir. Ötən ilki yarışda iştirakçıların sayı 500 nəfər idisə, bu il müraciət edənlərin sayı 700-ə çatmışdır.
Açılış mərasimindən sonra komandalar arasında yoldaşlıq görüşü keçirilmişdir. Mayın 2-dən 16-dək keçirilmiş zona mərhələlərindən finala vəsiqələri “İxlas” (Hacıqabul), “Zəka” (Qəbələ), “Kəpəz” (Göygöl), “Cavadxan” (Gəncə), “Zirvə” (Ağstafa), “Vulkan” (Masallı), “Ziyalı” (Ucar), “Sim-sim” (Sumqayıt), “Eldorado” (Sumqayıt), “Renessans” (Sumqayıt), “İntellekt” (Tərtər), “Çələbixan (Şəki), “Triumf” (Bakı), “Diskont” (Bakı), “Analoqu olmayan” (Bakı), “Evrika” (Bakı) komandaları qazanmışlar.
Yarış Gənclər və İdman Nazirliyinin dəstəyi ilə Gənclərin İntellektual İnkişaf Mərkəzinin təşkilatçılığı ilə keçirilir. Mayın 25-dək davam edəcək “Xəmsə” intellektual oyununun qaliblərinə nazirliyin qiymətli hədiyyələri və diplomları təqdim ediləcəkdir.
Bölmənin digər xəbərləri
