XOCALI FACİƏSİ İLƏ ƏLAQƏDAR BELÇİKADA YIĞINCAQ VƏ MİTİNQ KEÇİRİLMİŞDİR
DAK-ın sədri doktor Cavad Derəxti yığıncağı açaraq, dünyanı narahat edən terror aktları, Xocalı soyqırımı, uydurma “erməni soyqırımı” və bununla bağlı türk tarixçi alimlərinin Rusiya arxivlərində apardıqları araşdırmalar barədə məlumat vermişdir.
Sonra çıxış edən ölkəmizin Belçikadakı səfiri Arif Məmmədov Xocalı soyqırımını XX əsrin tarixində qanlı səhifə kimi səciyyələndirmiş, Avropa İttifaqının Ermənistan-Azərbaycan, Dağlıq Qarabağ münaqişəsinin dinc vasitələrlə həllinə xüsusi maraq göstərdiyini, bu sahədə müəyyən addımlar atdığını, ölkəmizin ərazi bütövlüyünü dəstəklədiyini, münaqişənin sülh yolu ilə həlli barədə hər iki tərəfə müraciət etdiyini bildirmişdir. Səfir demişdir ki, Avropa İttifaqının məqsədi regionda sülh yaradılması, Cənubi Qafqaz ölkələri arasında müxtəlif sahələrdə əməkdaşlığa nail olmaqdır.
Türkiyə səfirliyinin birinci katibi Nurdan Bayraqdar Xocalı faciəsinin erməni vəhşiliyini dünyaya bir daha tanıtdığını xatırladaraq demişdir ki, Cənubi Qafqazda “Yeni qonşuluq siyasəti”nin həyata keçirilməsi burada sülhün bərqərar edilməsindən asılıdır. İşğalçı Ermənistan Azərbaycan ərazilərindən çıxmalı, qaçqın və məcburi köçkünlər doğma torpaqlarına qayıtmalıdırlar. Avropa İttifaqı da münaqişənin həllinə yardımçı olmalıdır.
Kipr türkləri icmasının nümayəndəsi Yalçın Behit, DAK sədrinin beynəlxalq əlaqələr üzrə müavini, Amerikada yaşayan soydaşlarımız Rəhim Şahbazi, Dünya Azərbaycanlılarının Əlaqələndirmə Şurası sədrinin müavini, İngiltərənin Edinburq Universitetinin professoru Qulamrza Təbrizi, DAK-ın üzvü Əjdər Tağızadə, türk araşdırıcısı Mehmet Pərincik, ermənilərin türklərə və azərbaycanlılara qarşı törətdikləri vəhşiliklərdən bəhs edən “Lobbi hakimiyyəti” kitabının müəlliflərindən biri Mustafa Öztürk, Londondakı Azərbaycanlı Tələbələr Assosiasiyasının prezidenti Taleh Heydərov çıxışlarında Xocalı faciəsinin dəhşətlərini, yüzlərlə azərbaycanlıların hələ də erməni əsirliyində qaldığını, Xocalı soyqırımı haqqında həqiqətlərin dünyada getdikcə yayıldığını, Amerika mətbuatında da bu faciənin işıqlandırıldığını, Qarabağ probleminin həlli sahəsində Prezident İlham Əliyevin fəaliyyətinin dünya azərbaycanlıları tərəfindən dəstəkləndiyini vurğulamışlar. Bildirilmişdir ki, Londonda təhsil alan azərbaycanlı tələbələr Xocalı faciəsindən bəhs edən xüsusi sayt yaratmışlar.
ABŞ-ın Montana Universitetinin professoru, “Azərbaycan gündəliyi” kitabının müəllifi Tomas Qoltsun çıxışı xüsusi maraq doğurmuşdur. İştirakçıları Azərbaycan dilində salamlayan amerikalı alim Xocalı faciəsi baş verən zaman ölkəmizdə olduğunu, bu xəbəri eşidən kimi dərhal Ağdama getdiyini, orada gördüklərindən dəhşətə gəldiyini söyləmişdir.
XX əsrdə dünyanın qaynar nöqtələrində baş vermiş hadisələrdən danışan T.Qolts Xocalı faciəsinin daha ağır təsir bağışladığını, qırğından bir qədər əvvəl üç dəfə bu şəhərdə olduğunu, orada özünə dostlar tapdığını, Azərbaycanın Əlif Hacıyev kimi qəhrəman oğlunun, həm də dostunun həlak olmasının onda erməni qəsbkarlarına nifrət hissi oyatdığını bildirmişdir.
Xocalı faciəsi ilə əlaqədar topladığı faktları istər məqalə, istərsə də ayrıca kitab şəklində çap etdirmək istərkən naşirlərin ermənilərin tərəfini saxladıqlarını, onu yalançı adlandırdıqlarını, hətta İslam dinini qəbul etdiyini bildirdiklərini xatırlatmış, Amerika mətbuatının və naşirlərin uydurma erməni təbliğatına üstünlük verdiklərini xüsusi vurğulamışdır. Ölkəmizə dost münasibəti ilə tanınan avstraliyalı alim Erik Feyçel də vaxtilə “Bir terrorun əfsanəsi” kitabını nəşr etdirmək istərkən, naşirlərin erməni terrorundan bəhs edən kitabı buraxmaqdan boyun qaçırdıqlarını, ermənilərin terror aktlarından açıq-aşkar ehtiyat etdiklərini bildirmişdir. Eyni zamanda, erməni vəhşiliyindən bəhs edən yeni kitabçasının ərəb, fars, rus, ingilis, fransız, alman, türk, yapon, Koreya və Azərbaycan dillərində çap olunduğunu xatırlatmışdır. O demişdir ki, ötən əsrdə onlarca türk diplomatı erməni terrorunun qurbanı olmuşdur. Bu terror aktlarının arxasında daşnaklar durmuşdur. Bu işdə erməni kilsəsinin və din xadimlərinin də “xüsusi xidməti”ni qeyd etmək lazımdır. İstər Türkiyə, istərsə də Azərbaycan haqqında həqiqətləri Avropa ölkələrinə, dünya xalqlarına çatdırmaq üçün çoxlu kitablar çap etdirməli və ermənilərin əsil siması göstərilməlidir.
Yığıncaq zamanı “Kür-Xəzər” qəzetinin Xocalı faciəsindən bəhs edən ingilis və Azərbaycan dillərindəki xüsusi buraxılışı, kitablar, broşürlər, Brüsseldə çap olunmuş “Beltürk”, “Azərbaycan-Benlüks” qəzetləri nümayiş etdirilmişdir.
X X X
Həmin gün Avropa İttifaqının iqamətgahı qarşısında mitinq keçirilmişdir. Əllərində Azərbaycanın və Türkiyənin bayraqlarını tutmuş mitinq iştirakçıları “Ermənilərə ar olsun!”, “İşğal olunmuş Azərbaycan əraziləri tezliklə azad edilməlidir” və digər şüarlar səsləndirmişlər. Xocalı faciəsini əks etdirən plakatlar və fotostendlər mitinqdə nümayiş etdirilmişdir.
Mitinqdə professor, şair Paşa Qəlbinur, Əmir Hacıyev, xalq artisti İlhamə Quliyeva, Xəzər Emin, Rəhim Şahbazi, Cavad Derəxti və başqaları çıxış edərək, Avropa İttifaqının və digər beynəlxalq təşkilatların Xocalı soyqırımına siyasi qiymət verməsini, ölkəmizə qarşı işğalçılıq siyasəti aparan Ermənistana qarşı sanksiyalar tətbiq olunmasını tələb emişlər. İlhamə Quliyeva “Ana yurdum Azərbaycan” mahnısını ifa etmiş və iştirakçılar da ona qoşulmuşlar.
Axşam “Royal Kroun” mehmanxanasının iclas salonunda yığıncaq öz işini davam etdirmişdir. Çıxış edən türk alimləri uydurma “erməni soyqırımı”nın türk dünyasına qarşı yönəldildiyini konkret faktlarla açıqlamışlar.
Tədbirin sonunda P.Qəlbinur Xocalı faciəsi ilə bağlı essesini oxumuş, xalq artisti Niyaməddin Musayevin ifasında azərbaycanlı qaçqın-köçkünlərə həsr olunmuş “Azərbaycanım” və “Qiyamətə qalmasın” klipləri səsləndirilmiş, Ə.Hacıyevin “Qarabağ şikəstəsi” sənədli filmi nümayiş etdirilmişdir.
Bölmənin digər xəbərləri
