XOCALI FACİƏSİ QAN YADDAŞIMIZDA YAŞAYIR
Mədəniyyət və Turizm Nazirliyinin, Rəssamlar İttifaqının və İncəsənət Muzeyinin birgə təşkilatçılığı ilə təşkil olunan sərgidə 40 rəssamın boyakarlıq, qrafika və heykəltəraşlıq janrlarında 70-dən çox əsəri nümayiş etdirilir. Tamaşaçılara təqdim olunan sənət əsərləri arasında Azərbaycan Dövlət Rəssamlıq Akademiyası tələbələrinin də işləri yer almışdır.
Əvvəlcə, Xocalı faciəsi qurbanlarının xatirəsi birdəqiqəlik sükutla yad edilmişdir.
Muzeyin direktoru, sənətşünaslıq doktoru İsrafil İsrafilov tədbiri açaraq bildirmişdir ki, ermənilər Xocalı soyqırımını törətməklə özlərinin tarixi cinayətkar olduqlarını bir daha göstərmişlər.
Mədəniyyət və turizm naziri Əbülfəz Qarayev, Rəssamlar İttifaqının sədri, xalq rəssamı Fərhad Xəlilov, akademik Bəkir Nəbiyev, Milli Məclisin deputatı, AMEA-nın müxbir üzvü Nizami Cəfərov və başqaları “Böyük Ermənistan” xülyası ilə yaşayan ermənilərin əsrlər boyu əzəli Azərbaycan torpaqlarına göz dikmələrindən, zaman-zaman xalqımıza qarşı soyqırımı siyasətini həyata keçirmələrindən, bu xəbis niyyətlərini reallaşdırmaq üçün müxtəlif mənfur üsullara əl atmalarından ətraflı danışmışlar. Natiqlər vurğulamışlar ki, XX əsrin ən böyük faciələrindən olan Xocalı soyqırımını da onlar məhz bu məqsədlə, sovet ordusu alayının köməyi ilə, əliyalın insanlara qarşı xüsusi amansızlıqla həyata keçirmişlər.
Çıxışlarda Azərbaycanın öz torpaqlarını gec-tez düşmən tapdağından azad edəcəyinə inam vurğulanmışdır.
Sərgi fevralın axırınadək davam edəcəkdir.
Bölmənin digər xəbərləri
