Xocalı sakini: Həsrət başa çatdı, doğma yurda qovuşduq
Xocalı, 29 aprel, Tahir Ağaməmmədov, AZƏRTAC
1992-ci ildə Xocalını tərk edib müxtəlif vaxtlarda Şəki, Ağcabədi, Ağsu və Goranboy rayonlarında məskunlaşdıq. 30 ildən çox Vətəndən ayrı qaldıq, yurd həsrəti ilə yaşadıq. Nəhayət, bu gün həsrət başa çatdı, doğma yurda qovuşduq.
AZƏRTAC-ın bölgə müxbiri xəbər verir ki, bu sözləri Xocalı rayonunun Ballıca kəndinə köç edən keçmiş məcburi köçkün Zakir Əliyev söyləyib.
“Köçkünlük illərində atam, anam dünyasını dəyişdi. Bu gün doğma torpağımıza həyat yoldaşım, oğlum, qızım, gəlinim və nəvəmlə qayıtmışam. Bu sevinci bizə bəxş Prezidentimizə, Ordumuza minnətdaram” - deyə o bildirib.
Qeyd edək ki, bu gün respublikanın müxtəlif şəhər və rayonlarından yola salınan 15 ailə olmaqla, 68 nəfər keçmiş məcburi köçkün doğma yurduna – Ballıcaya qovuşub. Ballıcaya köç karvanı ilə qayıdanlar respublikanın müxtəlif yerlərində, əsasən yataqxanalarda, sanatoriya və inzibati binalarda müvəqqəti məskunlaşmış ailələrdən ibarət olub. Bununla da, Ballıca kəndində 172 ailənin, yəni 811 nəfərin daimi məskunlaşması təmin olunub. Kəndə keçmiş məcburi köçkün ailələrinin köçürülməsi prosesi bundan sonra da davam edəcək.
Bölmənin digər xəbərləri
