Xocalı Soyqırımı Memorial Kompleksi Azərbaycanın strateji baxışının ifadəsidir - ŞƏRH
Bakı, 2 mart, AZƏRTAC
Xocalı Soyqırımı Memorial Kompleksinin açılışı yalnız tarixi yaddaşın bərpası deyil, eləcə də müasir Azərbaycanın siyasi iradəsinin, dövlət gücünün və strateji baxışının ifadəsidir. Bu hadisə artıq ədalətin bərpa olunduğu və dövlət suverenliyimizin tam təmin edildiyi yeni mərhələnin siyasi simvoludur. Xocalının dirçəlişi Azərbaycanın həm mənəvi, həm də geosiyasi qələbəsinin təsdiqidir. Bu gün Azərbaycan 1990-cı illərin əvvəllərindəki zəif və müdafiəsiz dövlət deyil. Ümummilli Liderin əsasını qoyduğu inkişaf strategiyası Prezident İlham Əliyev tərəfindən ardıcıl və məqsədyönlü şəkildə davam etdirilərək ölkəmizi regionun aparıcı güc mərkəzlərindən birinə çevirib. İqtisadi islahatlar, enerji diplomatiyası, çoxşaxəli və balanslaşdırılmış xarici siyasət kursu, eləcə də ordunun modernləşdirilməsi Azərbaycanın müstəqil qərarvermə imkanlarını əhəmiyyətli dərəcədə genişləndirib. Nəticədə formalaşan siyasi xətt hər hansı güc mərkəzindən asılı olmayan və milli maraqlara söykənən müstəqil dövlət strategiyasıdır.
Bu sözləri AZƏRTAC-a açıqlamasında politoloq Aytən Qurbanova deyib.
O bildirib ki, qlobal sistemin qeyri-sabit və ziddiyyətli mərhələdən keçdiyi, regional münaqişələrin dərinləşdiyi bir dövrdə Azərbaycan balanslı diplomatiya vasitəsilə həm regional təhlükəsizliyə töhfə verir, həm də öz suverenliyini qətiyyətlə qoruyur. 44 günlük Vətən müharibəsində əldə olunan qələbə və 2023-cü ildə həyata keçirilmiş lokal xarakterli antiterror tədbirləri dövlətin siyasi qərarlarının düşünülmüş, hərbi strategiyasının isə peşəkar və nəticəyönümlü olduğunu aydın və konkret şəkildə bütün dünyaya göstərdi. Ən mühüm məqam isə bütün proseslərin beynəlxalq hüququn norma və prinsiplərinə əsaslanaraq həyata keçirilməsidir. Şübhəsiz ki, Xocalı soyqırımı XX əsrin ən ağır faciələrindən biri kimi xalqımızın yaddaşında silinməz iz buraxıb. Lakin otuz ilə yaxın dövr ərzində davam edən ədalətsizlik milli iradəni zəiflətmədi. Əksinə bu dövr milli həmrəyliyin möhkəmlənməsi, dövlətə və orduya inamın artması ilə xarakterizə olundu. Memorial Kompleksin məhz Xocalıda inşa edilməsi isə xüsusi simvolik məna daşıyır. Belə ki, bu hadisə tarixi həqiqətin öz məkanında təsdiqi və milli ləyaqətin bərpasıdır. Dövlətin vətəndaşına verdiyi mesaj isə aydın şəkildə ifadə olunub. Heç bir faciə unudulmur və heç bir cinayət cavabsız qalmır.
“Prezident İlham Əliyevin çıxışında xüsusi vurğulanan məqamlardan biri də ədalətin yalnız hərbi qələbə ilə deyil, həm də hüquqi müstəvidə təmin edilməsidir. Müharibə cinayətlərinə görə məsuliyyət daşıyan şəxslərin məhkəmə qarşısına çıxarılması Azərbaycanın gücünün və hüquqi legitimliyinin göstəricisidir. Dünya təcrübəsində nadir hallarda rast gəlinən unikal bir model formalaşıb. Azərbaycan həm ərazi bütövlüyünü bərpa edib, həm separatizmə son qoyub, həm də cinayətkarları hüquqi məsuliyyətə cəlb edib. Bu isə yalnız hərbi üstünlük deyil, güclü institusional dövlət quruculuğunun nəticəsidir. Uzun illər aparılan diplomatik fəaliyyət, beynəlxalq təşkilatlarda qəbul edilən qərarlar, ikitərəfli və çoxtərəfli tərəfdaşlıqlar Azərbaycanın mövqeyini möhkəmləndirən mühüm məqamlardır. Enerji və nəqliyyat layihələri ölkəmizi regional kommunikasiya mərkəzinə çevirib.
Heç şübhəsiz ki, Prezident İlham Əliyevin müdrik diplomatik strategiyası mərhələli və strateji səbir üzərində qurulub. İlk növbədə, beynəlxalq legitimlik təmin olunub, güc balansı formalaşdırılıb, daha sonra isə hərbi mərhələ başa çatdırılıb”, - deyə politoloq əlavə edib.
Bölmənin digər xəbərləri
