XOLON “GÜMÜŞÜ”
İsrailin Xolon şəhərində bədii gimnastika üzrə beynəlxalq turnirdə Azərbaycan komandası gümüş medallar qazanmışdır. Azərbaycan Gimnastika Federasiyasının mətbuat xidmətindən AZƏRTAC-ın müxbirinə verilən məlumata görə kollektivimiz birinci hərəkətə (3 halqa - 4 gürz) 16.625 xal, ip ilə 5 hərəkətə görə isə 16.650 xal qazanmışdır. Nəticədə Vəfa Hüseynova, Anna Bitiyeva, Valeriya Yeqay, Alina Tryopina və Anastasiya Prasolovadan ibarət komandamız meydan sahiblərindən sonra 2-ci yeri tutmuşdur.
“Neftçi” nümayəndəsi Zeynəb Cavadlı bu turnirdə yeniyetmələr arasında çıxış edirdi. Onun çoxnövçülükdə 3-cü nəticə göstərməsi üçün cəmi 0,8 xal çatmamışdır: 60,1 xal toplamış Zeynəb, Özbəkistan, Ukrayna və Estoniya idmançılarından sonra 4-cü nəticə göstərmişdir.
İsraildə Qran-Pri mərhələsində Dinara Gimatova və Anna Qurbanova çıxış etmişlər. Halqa və lent ilə hərəkətlərdə daha yaxşı nəticə göstərərək 5-ci yeri tutmuş Dinara çoxnövçülükdə 7-ci yerlə kifayətlənməli olmuşdur. Qurbanova isə istər ip və gürzlə hərəkətlərdə, istərsə də mütləq birincilikdə ən güclü 8 gimnast siyahısında axırıncı olmuşdur.
Sankt-Peterburqda isə olimpiya çempionu A.Dityatinin Kuboku uğrunda yarışlar olmuşdur. Burada azərbaycanlı gimnast Şakir Şıxəliyev bürünc medal qazana bilərdi. Lakin onun yaşlı gimnastlar qrupunda yeniyetmə kimi çıxış etməsi və yarış təcrübəsinin olmaması öz təsirini göstərmişdir. Nəticədə o, sərbəst hərəkətlərdə, tullanma və bruslarda 4-cü yerləri, gimnastika atı üzərində hərəkətlərdə 8-ci, çoxnövçülükdə isə 16-cı olmuşdur.
Ötən həftə gimnastika turnirləri, necə deyərlər, bol olmuşdur. Belə ki, Fransada akrobatik gimnastika üzrə dünya kubokunun növbəti mərhələsi keçirilmişdir. Yarışlarda Azərbaycanı qadın cütlüyü (Ayla Əhmədova və Dilarə Sultanova), həmçinin kişilərdən ibarət qrup təmsil edirdi (Rüstəm Nəcəfquliyev, İlham Abbasov, Elnur Məmmədov və Fərid Məmmədov). Qızlarımız seçmə mərhələni asanlıqla başa vuraraq finalda özlərinə yer təmin etmişlər. Kişilər qrupu isə tarazlıq hərəkətində piramida qurarkən uğursuzluğa düçar olsa da, temp kompozisiyasını daha yaxşı yerinə yetirmişlər. Kubokun final mərhələsində qarışıq hərəkətlərdə bizim qızlar 6-cı, kişilər isə 8-ci nəticə göstərmişdir.
Bədii gimnastika üzrə yeniyetmələr arasında daha bir turnir Yaroslavlda keçirilmişdir. Beynəlxalq yarışlarda ilk dəfə çıxış edən 12 yaşlı Aynur Cabbarlı çoxnövçülükdə 21-ci yeri tutmuşdur. Bundan əlavə, Aynur “Turnirin ən cazibədar iştirakçısı” kimi xüsusi mükafata layiq görülmüşdür.
Bölmənin digər xəbərləri
