Xorvatiyalı qapıçı: Azərbaycanda “Qarabağ” kimi daha 2 klub olsa, liqanın səviyyəsi artar
Bakı, 30 mart, AZƏRTAC
“Qarabağ” tamamilə fərqli klubdur”.
Bu sözləri AZƏRTAC-a açıqlamasında “Qarabağ”ın sabiq qapıçısı Miro Varvodiç keçmiş komandasının Azərbaycan Premyer Liqasında 11-ci çempionluğu əldə etməsi barədə danışarkən deyib.
Xorvatiyalı qolkiper bildirib ki, Ağdam klubu hər şeydən əvvəl bir ailədir: “Qarabağ” möhtəşəm komandadır. Çox yaxşı prezidenti və Qurban Qurbanov kimi güclü məşqçisi var. Oradakı insanlar harada işlədiklərini yaxşı dərk edirlər. Çempionluğa görə sabiq komandamı təbrik edirəm. Ümid edirəm ki, növbəti mövsümdə də avrokuboklarda uğurlu çıxış edəcəklər”.
35 yaşlı futbolçu Azərbaycan Premyer Liqasının səviyyəsi barədə də fikirlərini bölüşüb: “Düşünürəm ki, “Qarabağ” kimi daha iki güclü komanda olsa, liqanın səviyyəsi artar. Çünki stadiona gələn azarkeşlər də maraqlı oyunlara şahidlik etmək istəyirlər”.
Qeyd edək ki, Miro Varvodiç 2012-ci ilin yayından 2014-cü ilin yanvarınadək “köhlən atlar”ın şərəfini qoruyub.
Bölmənin digər xəbərləri
