“Xoşbəxt Yusifzadə qiraətləri” beynəlxalq elmi konfransı işə başlayıb
Bakı, 4 dekabr, AZƏRTAC
Dekabrın 4-də Elm və Təhsil Nazirliyinin Neft və Qaz İnstitutunun təşkilatçılığı, SOCAR-ın və bp şirkətinin sponsorluğu ilə görkəmli neftçi-geoloq, geologiya-mineralogiya elmləri doktoru, professor, akademik Xoşbəxt Yusifzadənin xatirəsinə həsr olunmuş “Xəzər regionunun neft-qazlılığı və geoekoloji” problemləri mövzusunda “Xoşbəxt Yusifzadə qiraətləri” beynəlxalq elmi konfransı öz işinə başlayıb.
AZƏRTAC xəbər verir ki, tədbiri açan Neft və Qaz İnstitutunun baş direktoru akademik Fəxrəddin Qədirov akademik Xoşbəxt Yusifzadənin Azərbaycanın neft sənayesində parlaq səhifələr yazmış görkəmli neftçi-geoloq olduğunu söyləyib. Qeyd edib ki, akademik Xoşbəxt Yusifzadə Xəzər dənizindəki axtarış-kəşfiyyat işlərinə uzun illər rəhbərlik edib və onun bilavasitə iştirakı ilə 20-dən artıq neft və qaz yatağı, o cümlədən “Azəri”, “Çıraq” və “Günəşli” yataqları kəşf edilərək istismara verilib. Həmin yataqların kəşfi və onların karbohidrogen ehtiyatları Azərbaycanın iqtisadi təhlükəsizlik sistemində mühüm əhəmiyyət kəsb edib.
Akademik qeyd edib ki, Xoşbəxt Yusifzadə, eyni zamanda, neft və qaz sənayesinin aktual problemlərinin həlli, neft-qaz hasilatının inkişafı və geofiziki axtarış üsullarının təkmilləşdirilməsi sahəsində fundamental araşdırmaların müəllifi kimi tanınıb.
Sonra çıxış edən Geologiya və Geofizika İnstitutunun baş direktoru akademik Akif Əlizadə görkəmli neftçi-geoloq alim Xoşbəxt Yusifzadə ilə bağlı xatirələrini bölüşüb. Diqqətə çatdırıb ki, Xəzər dənizinin dibinə yaxından bələd olan Xoşbəxt Yusifzadə keçmiş SSRİ-nin hökumət başçısı Aleksey Kosıginə Azərbaycanın neft ehtiyatları ilə bağlı məruzə edib, sovet rəhbərliyinin diqqətini bu istiqamətə yönəldə bilib.
Akademik Akif Əlizadə bildirib ki, akademik Xoşbəxt Yusifzadə Ulu Öndər Heydər Əliyevin və Prezident İlham Əliyevin rəhbərliyi altında çalışaraq Azərbaycanın neft salnaməsini yazıb, dövlətimizin iqtisadi gücünü artıran “Əsrin müqaviləsi” kimi tarixi sənəd imzalanıb.
O, çıxışının sonunda Xoşbəxt Yusifzadənin həyatının gənc kadrlara bir nümunə olduğunu, yeni nəslin yetişməsi üçün elmlə istehsalatın vəhdətinin xüsusi əhəmiyyət kəsb etdiyini vurğulayıb.
Konfransda çıxış edən AMEA-nın prezidenti akademik İsa Həbibbəyli akademik Xoşbəxt Yusifzadənin ziyalı adını ucaldan şəxsiyyətlərdən biri olduğunu deyib. Qeyd edib ki, geologiya sahəsində dərin biliyə malik, Xəzər dənizini çox yaxşı tanıyan Xoşbəxt Yusifzadə kompleks araşdırmaları, zəngin dünyagörüşü, kəşfləri ilə Azərbaycan neftinə həyat verib, neft sənayemizin elmi sütununu təşkil edib.
Diqqətə çatdırıb ki, alimin müstəqillik illərində dövlətimizin iqtisadi gücünü artıran “Azəri”, “Çıraq”, “Günəşli”, “Şahdəniz” kimi iri neft və qaz yataqlarının kəşfi və istehsalında mayak rolunu oynayıb.
AMEA rəhbəri görkəmli alim Xoşbəxt Yusifzadənin istehsalatla yanaşı, həm də peşəkar elmi tədqiqatları ilə Azərbaycan neft elmi məktəbini yaratdığını deyib.
Bundan əlavə, Xoşbəxt Yusifzadənin Azərbaycan humanitar və ictimai elmlərinə töhfə verdiyini, alimin dəstəyi ilə akademiyada “Molla Nəsrəddin lətifələri” kitabının işıq üzü gördüyünü diqqətə çatdırıb.
Sağlığında Xoşbəxt Yusifzadənin adının dövlətimiz tərəfindən əbədiləşdirilməsi istiqamətində mühüm addımlar atıldığını qeyd edən akademik İsa Həbibbəyli 112 nömrəli tam orta məktəbə, Bakı gəmiqayırma zavodunda inşa olunan “Akademik Xoşbəxt Yusifzadə” tankerinə görkəmli neftçi-alimin adının verildiyini deyib.
Konfransda, həmçinin SOCAR-ın vitse-prezidenti Arzu Cavadova, bp-nin Xəzər regionu üzrə vitse-prezidenti Bəxtiyar Aslanbəyli, Milli Məclisin deputatı Ziyad Səmədzadə, ADNSU-nun rektoru vəzifəsini icra edən Vazeh Əskərov və İ.M.Qubkin adına Rusiya Dövlət Neft və Qaz Universitetinin Daşkənd filialından professor Bahşillo Akramov çıxış edərək akademik Xoşbəxt Yusifzadə ilə bağlı xatirələrini bölüşüb, onun yüksək insani keyfiyyətlərə və güclü yumor hissinə malik olduğunu, mühüm tədqiqatları ilə Azərbaycanın neft strategiyasını zənginləşdirdiyini bildiriblər.
Çıxışlardan sonra görkəmli neftçi-geoloq alimin həyat və fəaliyyətini əks etdirən videoçarxa baxılıb.
Plenar iclasdan sonra tədbirdə məruzələr dinlənilib.
Qeyd edək ki, konfrans çərçivəsində Neft və Qaz İnstitutu ilə Serqo Orconikidze adına Rusiya Dövlət Geoloji Kəşfiyyat Universiteti tərəfindən modelləşdirilmə məktəbi təşkil ediləcək. Məktəbdə “Geoloji proseslərin və karbohidrogen sistemlərinin modelləşdirilməsi” adlı təlim kursu keçiriləcək. Konfransda ümumilikdə 80-dən çox məruzə dinləniləcək.
Konfransa dekabrın 5-də yekun vurulacaq.
Bölmənin digər xəbərləri
