İQTİSADİYYAT
XRİTDX-nin nümayəndələri bir sıra beynəlxalq tədbirlərdə iştirak ediblər
![](/files/galleryphoto/2024/1/1200x630/1709646662109989240_1200x630.jpeg)
![](/files/galleryphoto/2024/1/1200x630/17096466625859425165_1200x630.jpeg)
Bakı, 5 mart, AZƏRTAC
İspaniyanın Barselona şəhərində keçirilən və 100 mindən çox ziyarətçinin iştirak etdiyi MWC-2024 (Mobile World Congress) tədbiri çərçivəsində Xüsusi Rabitə və İnformasiya Təhlükəsizliyi Dövlət Xidmətinin nümayəndələri “Huawei" şirkətinin təşkilatçılığı ilə keçirilən “Qlobal hökumət və tənzimləyici qurumlar üçün dəyirmi masa forumu”na qatılıb, “Huawei” şirkətinin ümumi və xüsusi sərgi zallarında təqdim olunan yeniliklər və xidmətlərlə tanış olublar.
Xüsusi Rabitə və İnformasiya Təhlükəsizliyi Dövlət Xidmətinin CERT mərkəzinin nümayəndələri OIC-CERT (Organization of İslamic Cooperation) Direktorlar Şurasının 2024-cü il üzrə keçirilən ilk iclasında iştirak ediblər. Qapalı görüşdə İdarə Heyəti üzvlərinin ötən ilin fəaliyyət planına uyğun olaraq gördükləri işlərin yekun hesabatları dinlənilib, 2024-cü il üzrə görüləcək işlərə dair tədbirlər planı təqdim olunub, gündəlikdə olan məsələlər müzakirə edilib. İdarə Heyəti tərəfindən təsdiq edilmiş illik fəaliyyət planına əsasən Azərbaycan cari ildə də təşkilatın 4-cü strateji istiqaməti olan “Texnika və texnologiya” sahəsinə rəhbərlik edəcək.
OIC-CERT tərəfindən inkişaf edən qlobal kibertəhlükəsizlik mənzərəsini və problemləri birgə müzakirə etmək məqsədilə ümumi görüş təşkil edilib. “Rəqəmsal etibarlılıq və dayanıqlılığın təşkil edilməsi” mövzusuna həsr olunan tədbirdə İƏT üzrə komitənin 13 üzvü olan Azərbaycan ilə yanaşı, Oman, Malayziya, Birləşmiş Ərəb Əmirlikləri (BƏƏ), İndoneziya, Bruney, Misir, Banqladeş, İordaniya, Nigeriya, Özbəkistan, eləcə də iki şirkət – “Huawei” və “Comstech” iştirak edib. Dəyirmi masa müzakirələrində OIC-CERT-in ötənilki tədbirlər planına və təşəbbüsünə əsasən “5G təhlükəsizliyi” və “Bulud təhlükəsizliyi” işçi qrupları öz fəaliyyətlərini tamamlayaraq təqdimatlarla çıxış edib və “Süni intellekt təhlükəsizliyi”, “Təchizat zənciri təhlükəsizliyi” kimi yeni potensial işçi qrupların yaradılması müzakirə olunub. Müzakirələr zamanı Xüsusi Rabitə və İnformasiya Təhlükəsizliyi Dövlət Xidmətinin nümayəndələri sözügedən mövzu və sahələr üzrə təcrübələrini bölüşüb, Azərbaycanda kibertəhlükəsizlik istiqamətində həyata keçirilən genişmiqyaslı fəaliyyətlərdən ətraflı məlumat veriblər.
Daha sonra Xüsusi Rabitə və İnformasiya Təhlükəsizliyi Dövlət Xidmətinin nümayəndələri “Huawei” şirkətinin Belçikanın Brüssel şəhərində yerləşən Kibertəhlükəsizlik üzrə Şəffaflıq Mərkəzini ziyarət ediblər. Mərkəzin mütəxəssisləri tərəfindən bir sıra layihələr təqdim olunub, iştirakçilara əlavə təlimlər keçirilib.