Yalçın Hacızadə: Ermənistan təxribatlardan əl çəkmir və Azərbaycanın təklifləri vaxtında dəyərləndirmir
Bakı, 3 noyabr, AZƏRTAC
Ermənistanın müxtəlif təxribatlarına baxmayaraq, Prezident İlham Əliyevin “Qarabağ münaqişəsi artıq bitib” fikri Soçi görüşünün əsas siyasi xəttini təşkil etdi. Ermənistan Praqa görüşündən sonra bölgəyə Avropa nümayəndələrinin gəlməsini təşkil etdi, Rusiyaya, hərbi ittifaq olan KTMT-yə qarşı kampaniyalar başladaraq erməni cəmiyyətində Qərbə meyilliliyi artırmağa çalışdı. Bütün bu səylər Rusiyanın Ermənistanla daha çox maraqlanması və Azərbaycana təsir etməsinə hesablanıb.
Bu fikirləri AZƏRTAC-a açıqlamasında Ana Vətən Partiyası sədrinin müavini Yalçın Hacızadə söyləyib.
Politoloq qeyd edib ki, Azərbaycan-Ermənistan münasibətlərinin tənzimlənməsi ilə bağlı proseslər müxtəlif platformalarda aparılır. Bu, əsasən Rusiyanın vasitəçiliyi və Avropa İttifaqının iştirakı ilə həyata keçirilir. Bu platformalar bir-birinin əksi kimi görünsə də, ölkəmiz Ermənistanla münaqişənin bitməsi baxımından müxtəlif kuluarlarda təşkil olunan müzakirələrdə maraqlıdır. Hər iki müstəvidə keçirilən görüşlərdə Azərbaycanın açıq, konkret və sülhü təmin etmək məqsədi daşıyan şərtləri var. Azərbaycandan fərqli olaraq, Ermənistan bu istiqamətdə nizamsız, təxribat və şantaj xarakterli siyasət yürüdür.
“Ümumiyyətlə, belə görüşlər zamanı Azərbaycan əldə etdiklərinin müzakirə predmeti olmasına imkan vermir, bundan sonrakı məsələləri müzakirə müstəvisinə çıxarır. Azərbaycan üçün münaqişə bitib, Qarabağ problemi yoxdur, ərazimizdə yaşayan ermənilərin taleyi, onların hüquqları dövlətimizin daxili işidir. Bu, beynəlxalq hüquqda, BMT-nin Nizamnaməsində və Azərbaycanın qanunvericiliyində də təsbit olunub.
Soçi görüşündə Nikol Paşinyan deyib ki, “Azərbaycan silahlı qüvvələri bu ilin martında Qarabağda Rusiya sülhməramlılarının məsuliyyət zonasına müdaxilə edib və hələ də oradan çıxmayıb. O ümid edir ki, üçtərəfli görüşdə onlar bu məsələni də müzakirə edəcəklər”.
Fikir veririk ki, Ermənistanın şikayətləri getdikcə çoxalır. Bu, ona görə baş verir ki, Ermənistan təxribatlardan əl çəkmir və Azərbaycanın etdiyi təklifləri vaxtında dəyərləndirmir. Azərbaycan münaqişəni Ermənistanın qəbul etmək istəmədiyi hərbi-siyasi yolla həll etdikdən sonra qarşı tərəf ondan şikayət etməyə başlayır ki, vəziyyət əvvəlki yerə qayıtsın. Ölkəmiz müharibəni Qələbə ilə başa çatdırdıqdan sonra azad olunmuş ərazilərdə quruculuq işlərini və regionda sülhü təmin etmək üçün üzərinə düşən öhdəlikləri layiqincə yerinə yetirir. Eyni zamanda, Ermənistandan da irəli sürülmüş şərtləri yerinə yetirməsini tələb edir”, - deyə Y.Hacızadə vurğulayıb.
Diqqətə çatdırılıb ki, Soçi görüşündə dövlət başçıları tərəfindən razılaşdırılmış sənəddə həm 2020-ci il 10 noyabr, həm də 2021-ci il 11 yanvar bəyanatlarında göstərilmiş müddəalara istinad edilməsi və onların icrasının vacibliyinin bir daha vurğulanması Ermənistanın öhdəliklərinin icrasından yayınmaq üçün göstərdiyi “canfəşanlığ”ın nəticə vermədiyini göstərir. Sənəddə Qarabağa dair müddəaların olmaması Azərbaycan Prezidentinin bir neçə dəfə qeyd etdiyi kimi, “Qarabağ münaqişəsi bitmişdir, geridə qalmışdır” ifadəsinin qəbulunun bariz nümunəsidir. Ümumiyyətlə, həm Rusiyanın, həm də Avropa İttifaqının iştirakı ilə keçirilən görüşlərdə qəbul edilən yekun sənəd və bəyanatların şərtlərinə baxdıqda görmək olar ki, Prezident İlham Əliyevin müharibədən sonra sülhün təmin olunması üçün Ermənistandan tələb etdiyi bütün şərtlər sənədlərdə öz əksini tapır.
Politoloq əlavə edib ki, postmünaqişə dövründə Azərbaycan daim üçtərəfli bəyanatların tam şəkildə həyata keçirilməsi, bölgədə bütün kommunikasiyaların açılması, iki ölkə arasında sərhədlərin müəyyənləşdirilməsi prosesinin başlanması və münasibətlərin beynəlxalq hüquq prinsipləri əsasında normallaşması mövqeyindən çıxış edir. Əlbəttə ki, Azərbaycan öz məqsədlərinə çatmaq üçün üzərinə götürdüyü öhdəlikləri yerinə yetirdiyi kimi, qarşı tərəflərdən də imzalanmış bəyanatların şərtlərini yerinə yetirməsini tələb edəcək.
Bölmənin digər xəbərləri
