Yaponiyanın “Fujitomi” YouTube kanalında Azərbaycan haqqında veriliş yayımlanıb
Tokio, 19 mart, AZƏRTAC
Yaponiyanın “Fujitomi” YouTube kanalında Azərbaycanın uğurlarından bəhs edən növbəti veriliş yayımlanıb.
AZƏRTAC xəbər verir ki, verilişin aparıcısı “Sərhədləri aşanlar 3.0” şirkətinin baş meneceri Kazuyasu İşida məşhur yapon futbolçu, Yaponiya yığmasının üzvü Keysuke Hondanın Bakının “Neftçi” klubuna transferindən sonra bu ölkədə Azərbaycana böyük marağın yarandığını bildirib. Azərbaycan ilə Yaponiya arasında müxtəlif sahələrdə münasibətlərin inkişafı ilə yanaşı idman sahəsində əməkdaşlığın getdikcə genişlənməsindən bəhs edib. Qeyd edib ki, ötən əsrin 90-cı illərində müstəqilliyini bərpa edən Azərbaycan ümummilli lider Heydər Əliyevin rəhbərliyi ilə qısa müddətdə böyük uğurlara imza atıb. Ulu Öndərin müəyyən etdiyi inkişaf strategiyasının Prezident İlham Əliyev tərəfindən yaradıcı şəkildə uğurla həyata keçirilməsi Azərbaycanı yalnız regionun deyil, həm də bütün dünyanın nüfuzlu dövlətlərindən birinə çevirib. Uğurla həyata keçirilən qlobal enerji və nəqliyyat-kommunikasiya layihələri Azərbaycanın dünyanın aparıcı ölkələri ilə bərabər səviyyəli, qarşılıqlı hörmətə əsaslanan münasibətlər qurmasına təkan verib.
Verilişdə Azərbaycan ilə Yaponiya arasında dostluq münasibətlərinin sürətlə inkişaf etdiyi, siyasi, iqtisadi, mədəni, təhsil və idman sahəsində əməkdaşlıqda uğurlar əldə edildiyi qeyd olunub. Yaponiya şirkətlərinin Bakı Tbilisi-Ceyhan neft, Bakı-Tbilisi-Ərzurum qaz kəmərləri, ötən ilin dekabrında istifadəyə verilmiş TAP boru kəməri xəttində iştirakı barədə ətraflı bəhs edilib.
Azərbaycanın artıq bütün dünyada yalnız iqtisadi cəhətdən inkişaf etmiş dövlət deyil, həm də mühüm idman və bədən tərbiyəsi ölkəsi kimi tanındığı, ilk Avropa Oyunlarının məhz Bakıda təşkil olunduğu, Formula 1 Azərbaycan Qran-Prisinin yapon tamaşaçılar tərəfindən də böyük diqqət və maraqla izlənildiyi verilişdə xüsusi vurğulanıb.
Qeyd edilib ki, Yaponiyada xüsusi məhəbbətlə sevilən Keysuke Hondanın “Neftçi” futbol klubuna transferi iki ölkə arasında yalnız idman sahəsində deyil, eyni zamanda, digər sahələrdə də əməkdaşlığın inkişafına mühüm təsir göstərəcək.
Məlumat üçün qeyd edək ki, “Fujitomi” kanalı eyniadlı maliyyə şirkətinə məxsusdur və xarici ölkələrin iqtisadiyyatına maraq göstərən tamaşaçılar tərəfindən izlənilir. Yaponiya maliyyə sənayesinin Azərbaycana böyük marağı nəzərə alınaraq bu kanalda ölkəmiz haqqında müntəzəm verilişlər hazırlanır.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
