DÜNYA
Yaponiyanın hakim partiyasında daha bir fraksiya buraxılıb
![Yaponiyanın hakim partiyasında daha bir fraksiya buraxılıb](/files/2024/1/1200x630/17059946434102923097_1200x630.jpg)
Bakı, 23 yanvar, AZƏRTAC
Maliyyə hesabatlılığında qanun pozuntuları ətrafında qalmaqal səbəbindən Yaponiyanın hakim Liberal Demokrat Partiyasında (LDP) 2023-cü ilin dekabr ayınadək Baş nazir Fumio Kişidanın rəhbərlik etdiyi fraksiya buraxılıb.
AZƏRTAC Kyodo agentliyinə istinadla xəbər verir ki, fraksiyanın buraxıldığı barədə qərar rəsmən təsdiqlənib.
Fumio Kişida yanvarın 19-da çıxışı zamanı partiyadaxili fraksiyanın buraxılmasının əhalinin siyasətçilərə inamının bərpasına kömək edəcəyinə ümidini ifadə edib.
Bir müddət öncə LDP-nin sabiq Baş katibi Tosihiro Nikai fraksiyasının və sağlığında sabiq Baş nazir Sindzo Abenin rəhbərlik etdiyi fraksiyanın üzvləri də fəaliyyətlərini dayanırdıqlarını elan ediblər.
Hazırda Yaponiya prokurorluğu siyasi ianələrin toplanması zamanı yol verilən qanunsuzluqlarla bağlı təhqiqat aparır.
Qeyd edək ki, LDP-nin fraksiyaları öz üzvləri üçün təşkil etdiyi ziyafətlərə bilet satmaqla vəsait toplama kvotası təyin edib. Faktiki toplanan vəsaitlə müəyyən edilən kvota arasındakı fərq maliyyə sənədlərində əks olunmadığı üçün onun siyasətçilərə zərf şəklində qaytarıldığı və ya gizli siyasi fondlar üçün vəsait kimi istifadə oluna biləcəyi iddia edilir.
Qalmaqal Fumio Kişidanın rəhbərlik etdiyi hökumətin reytinqinin 30 faiz səviyyəsinədək aşağı düşməsi ilə nəticələnib. Həmçinin Sindzo Abe fraksiyasının 15 üzvü hökumətdəki vəzifələrini itirib, deputat Yositaka İkeda isə həbs olunub.