“Yaşıl qatar” sərgisinin kuratoru: Məqsədimiz muzeyi zənginləşdirməklə yanaşı, rəssamlarımızı tanıtmaqdır
Bakı, 26 noyabr, AZƏRTAC
Azərbaycan Dəmiryol Muzeyində sərgilənən eksponatlarla yanaşı, ilk dəfə olaraq müasir incəsənət əsərləri də ziyarətçilərin diqqətinə təqdim edilir. Sərgi bir il müddətində açıq olacaq və məqsəd yalnız muzeyi zənginləşdirmək deyil, həm də rəssamları tanıtmaq və müxtəlif mövzularda müzakirələr aparmaqdır.
Bunu AZƏRTAC-a açıqlamasında Azərbaycan Dəmiryol Muzeyində açılan “Yaşıl qatar” sərgisinin kuratoru Sitarə İbrahimbəyli deyib.
Onun sözlərinə görə, sərgidə insanların xatirələri ilə yanaşı, həmçinin ekosistem, yaşıl enerji mövzuları əks olunub. Sərgidə fərqli janrlar – heykəltəraşlıq, tekstil, kətan və digər sənət nümunələri də yer alıb.
Kurator əlavə edib ki, sərgidə ilk dəfə əsərləri təqdim olunan gənc rəssamlar də iştirak edir: “Gənclərə hər zaman dəstək oluruq. Onların fikirləri, duyğuları və düşüncələri kətan üzərində canlanır və tamaşaçılara ötürülür”.
O əlavə edib ki, sərgi həm incəsənət həvəskarlarını, həm də ekoloji və mədəniyyət mövzularına maraq göstərən ziyarətçiləri bir araya gətirir. Qatarın simvolikliyi vasitəsilə keçmiş xatirələr və gələcəyin yaşıl enerjisi ziyarətçilərə poetik bir səyahət təqdim edir.
Bölmənin digər xəbərləri
