Bərdə, 8 fevral, Tahir Ağaməmmədov, AZƏRTAC

Dünyada mal-qaranın qida ehtiyacının ödənilməsində hidroponik yaşıl qidalardan istifadə geniş yayılıb. Hidropon üsulu ilə hazırlanan yaşıl yemdən istifadə fermer təsərrüfatında yem istehsalına çəkilən xərcləri azaldır, heyvanların diri çəkisini, süd məhsuldarlığını və dölvermə qabiliyyətini artırır.

Tərtər Regional Aqrar Elm və İnnovasiya Mərkəzinin direktoru Bəhruz Nəzərov AZƏRTAC-ın bölgə müxbirinə bildirib ki, hazırda Avropa ölkələrində torpaqsız əkinçilik və ya torpaqdan istifadə etmədən bitki yetişdirmənin yeni üsulu olan hidroponikadan geniş istifadə edilir. Hidropon yaşıl yem 7-8 gün ərzində vegetasiya müddətini başa çatdırmış cücərdilmiş müxtəlif dənlərdən hazırlanır. Hidropon yem istehsalında cücərmə qabiliyyəti yüksək olan dənlərdən istifadə edilməlidir. Hidropon üsulu ilə hazırlanan yaşıl yem ev heyvanlarının həzm sistemini yaxşılaşdırır, diri çəkini və süd məhsuldarlığını artırır. Heyvanların rasionuna yaşıl yemi tətbiq etdikdə dölvermə qabiliyyəti 11 faiz artır, tibbi dərman xərcləri 15 faiz azalır, südün, ətin və yumurtanın keyfiyyəti yaxşılaşır. Cücərmiş arpada A vitamini yerkökünə nisbətən 23 dəfə, B vitamini kahıya nisbətən 22 dəfə, C vitamini isə sitrus bitkilərinə nisbətən 14 dəfə çoxdur. Məhsulun suvarılması və yığılması asan başa gəlir. Fermer təsərrüfatında yem istehsalına çəkilən xərclər azalır.

"Dünyada artıq çalışırlar ki, əkinəyararlı torpaqlardan otlaqlar kimi yox, daha səmərəli istifadə edilsin, günbəgün artan tələbatı ödəmək, ərzaq təhlükəsizliyinin qarşısının alınmasına yardımçı olmaq üçün bu cür innovativ texnologiyalardan istifadə əsas məqsəd olaraq qarşıya qoyulmalıdır. Heyvandarlığın inkişaf etdirilməsi məhz yaşıl yemdən istifadə etməklə daha məqsədəuyğundur" - deyə, Bəhruz Nəzərov bildirib.

Bir neçə aydır heyvanların yemlənməsində hidroponik yaşıl qidalardan istifadə edən Bərdə rayon Çəmənli kənd sakini Nəvai İsgəndərov deyib: "Ötən il mal-qaranın daha səmərəli yem ilə təmin etməklə bağlı internetdə məlumat axtararkən yaşıl yemin hazırlanması ilə rastlaşdım. Sonra Tərtər Regional Aqrar Elm və İnnovasiya Mərkəzinin mütəxəssislərindən hidropon üsulunun üstünlükləri ilə bağlı məlumatlar aldım. Artıq üç aya yaxındır ki, bu üsuldan istifadə edərək heyvanların yem təminatını qarşılayıram. Çox sərfəlidir. Bir kiloqram arpadan 7-10 kiloqram yaşıl yem əldə etmək olur. Bu yem heyvanların südünün artımında, yağlılığında, kökəlməsində çox faydalıdır. Hidropon üsulundan təcrübə məqsədilə istifadə edərək, bəhrəsini gördüm. Gələcəkdə daha geniş tətbiq edərək, heyvandarlığı inkişaf etdirmək fikrindəyəm. Fermerlərə də məsləhət görürəm ki, heyvanların qidalanmasında hidropon yaşıl yemlərdən istifadə etsinlər”.