Yeni növ nəhəng tısbağa tapılıb
Bakı, 21 oktyabr, AZƏRTAC
ABŞ-ın Yel Universitetinin beynəlxalq alimlər qrupu Qalapaqos adalarında nəhəng tısbağaların yeni növünü aşkar edib.
AZƏRTAC “Ria Novosti”yə istinadən xəbər verir ki, alimlər yeni növü DNT təhlilinin köməyi ilə kəşf ediblər.
"Bizim hesablamalarımıza görə, yeni tapılan tısbağaların sayı təqribən 250-dən 300-ə qədərdir. Bu tısbağalar adanın şərq hissəsində, Santa-Krusda yaşayır”,-deyə araşdırmalarda iştirak edən ekvadorlu alim Uoşinqton Tapiyu bildirib. Hazırda Qalapaqos arxipelaqında 11 növ nəhəng tısbağa var.
Qalapaqos adaları Sakit okeanda yerləşir və Ekvadora məxsusdur. Bu adalar bir çox nadir növlərin, o cümlədən nəhəng tısbağa, bir çox quşların və digər heyvanların məskunlaşdığı yerdir. Alimlərin fikrincə, Qalapaqos tısbağaları Çarlz Darvin üçün təbii seçim yolu ilə təkamül nəzəriyyəsinin yaradılmasında başlanğıc nöqtəsi olub. Alim məhz Qalapaqosa səyahət zamanı bu qənaətə gəlib ki, müxtəlif adalarda yaşayan «zirehli» tısbağalar bir-birindən fərqlənir.
Bölmənin digər xəbərləri
