Martın 1-də, Azərbaycan Prezidenti İlham Əliyevin Ağdam rayonuna səfəri çərçivəsində yeni salınmış Bənövşələr qəsəbəsinin təntənəli açılış mərasimi olmuşdur.

Mərasimə toplaşanlar Prezident İlham Əliyevi və xanımı Mehriban Əliyevanı böyük səmimiyyətlə qarşıladılar, hörmət və ehtiramlarını bildirdilər. Onların əllərində ulu öndər Heydər Əliyevin və dövlətimizin başçısının portretləri, dövlət bayraqları, şüarlar və transparantlar var idi.

Bənövşələr qəsəbəsinin tikintisinə 2004-cü ildən - Azərbaycan Prezidentinin “Azərbaycan torpaqlarının Ermənistan silahlı qüvvələri tərəfindən işğalı nəticəsində didərgin düşmüş, Bərdə və Ağcabədi rayonları ərazisində çadır düşərgələrində, eləcə də Bərdə rayonu ərazisində dəmir yolu üzərindəki yük vaqonlarında müvəqqəti yerləşdirilmiş Ağdam və digər rayonlardan olan məcburi köçkünlərin sosial, mənzil-məişət vəziyyətinin yaxşılaşdırılması və məşğulluğunun təmin edilməsi tədbirləri haqqında” 2004-cü il 4 fevral tarixli Sərəncamına əsasən başlanmışdır. Qəsəbənin tikintisinə 6,93 milyon AZN (34,63 milyard manat) xərclənmişdir. 460 evdən ibarət qəsəbədə 1893 nəfər məcburi köçkün yerləşdirilmişdir. Eyni zamanda, burada məktəb, feldşer-mama məntəqəsi, inzibati bina, icma mərkəzi, hamam, poçt şöbəsi tikilmiş, içməli su xətti çəkilmişdir. Birləşmiş Ərəb Əmirliklərinin Qızıl Aypara Cəmiyyətinin vəsaiti hesabına ticarət obyektinin, futbol və voleybol meydançalarının tikintisinə də başlanılmışdır.

Mərasimi Baş nazirin müavini, Dövlətqaçqınkomun sədri ƏLİ HƏSƏNOV açaraq dedi:

- Zati-aliləri, möhtərəm cənab Prezident!

Hörmətli xanım Mehriban Əliyeva! Bütün qaçqın və köçkünlərin hörmət və ehtiramını Sizə çatdıraraq, məlumat vermək istəyirəm ki, 115 min hektar ərazisi olan Ağdam rayonunun bu gün 73 faizi işğal altındadır. 166 min nəfər əhalinin 131 mini məcburi köçkündür. Hazırda 27 faiz ərazidə 60 min əhali yaşayır. Qəsəbələr tam hazır olandan sonra buradakı əhalinin sayı 80 minə çatacaqdır. Bu, o deməkdir ki, Ağdam əhalisinin tam yarısı 27 faiz ərazidə yaşayacaqdır.

Cənab Prezident, Sizin Sərəncamınızın icrası olaraq, Ağdam rayonu ərazisində 3860 evin tikintisi artıq başa çatmaqdadır. Burada çox böyük sosial infrastruktur yaranıbdır. 18 orta məktəb, 2 musiqi məktəbi, 10 tibb obyekti tikilmiş, 112 kilometr yol, 140 kilometr su xətti, 213 kilometr yüksək və aşağıgərginlikli hava elektrik xətləri, 40 kilometr irriqasiya xətti çəkilmiş, 124 artezian quyusu qazılmışdır. Yəni Ağdam rayonu ərazisində çox böyük sosial-texniki infrastruktur yaranıbdır.

Cənab Prezident, keçən il qaçqın-köçkünlər üçün sərf olunan vəsait ondan əvvəlki iki ildəki qədərdir. Bu il isə keçən ildəkindən 30 faiz artıq proqnozlaşdırılıbdır.

Cənab Prezident, keçən il ərzində məcburi köçkünlər arasında yoxsulluq həddi 72 faizdən 57 faizə enibdir. 25 min nəfər işlə təmin olunubdur. Bunun 5 mini daimi, 20 mini isə inşaat, nəqliyyat kompleksində, tikinti materialları istehsalı sahəsində açılan mövsümi iş yeridir. Sizin Sərəncamınızla keçən il hər bir məcburi köçkünə aylıq yemək xərcləri 25 min manatdan 30 min manata artırılmışdır. Yanacaq kimi paylanan ağ neft isə 30 litrdən 40 litrə çatdırılmışdır.

Cənab Prezident, bütün bunlar bir daha onu göstərir ki, dövlət, Azərbaycan Prezidenti ölkənin bütün imkanlarını, ilk növbədə qaçqın və köçkünlərin rifah halının yaxşılaşdırılmasına yönəldir. Hamımızın yadındadır ki, 1992-ci ildə o vaxtkı iqtidar, indiki müxalifət Azərbaycanın tarixində olmayan çadır şəhərcikləri yaratdı, Azərbaycanın ensiklopediyasına yeni bir termin əlavə etdi - çadır şəhərcikləri. Ulu öndər Heydər Əliyev bu çadır şəhərciklərinin sökülməsi və yeni qəsəbələrin tikilməsinə başladı. Azərbaycan Prezidenti möhtərəm cənab İlham Əliyev hazırda bu işi uğurla davam etdirir və çadır şəhərcikləri tamamilə ləğv olunur. Bir sözlə, qaçqınların və məcburi köçkünlərin sosial rifahının yaxşılaşdırılması üçün bütün imkanlar yaradılır. Biz tam əminik ki, cənab Prezidentin dediyi kimi, ölkənin yeganə problemi olan Ermənistan-Azərbaycan, Dağlıq Qarabağ münaqişəsi də Prezidentimiz tərəfindən həll olunacaqdır. Bizim isə borcumuz bu dövr ərzində dözüm və səbir nümayiş etdirməkdir. Bu yolda cənab Prezidentə uğurlar diləyirik.

İndi isə qəsəbə sakini, 12 il çadır şəhərciyində yaşamış, yeni tikilmiş məktəbin direktoru Tünzalə xanım öz fikirlərini sizinlə bölüşmək istəyir.

Ağdam rayonundakı 2 nömrəli orta məktəbin direktoru TÜNZALƏ VƏLİMƏMMƏDOVA çıxışında dedi:

- Möhtərəm cənab Prezident,

hörmətli Mehriban xanım, ümummilli liderimiz Heydər Əliyevin nəvəsi

Leyla,

hörmətli qonaqlar!

İcazə verin, sizi yeni salınmış Bənövşələr qəsəbəsinin sakinləri adından salamlayım və onların adından “Xoş gəlmisiniz!” deyim.

Hörmətli Prezident, Siz qaçqınların və məcburi köçkünlərin problemlərini Azərbaycanın ağrılı problemi hesab edərək, onu həmişə önə çəkmisiniz. Biz qaçqın və məcburi köçkünlərin sosial şəraitini yaxşılaşdırmaq üçün daim yeni-yeni işlər görmüsünüz.

Hörmətli Prezident, biz məcburi köçkünlər 2004-cü ilin sentyabrında Bərdə rayonunda yerləşən Türk Qızıl Ay çadır şəhərciyinin qarşısında Sizinlə görüşərkən, mən onların vəziyyətinin ağır, acınacaqlı olmasından söz açdım. O zaman Siz mənə çadır şəhərciklərinin ləğv olunacağını, gözəl, yaraşıqlı qəsəbələr salınacağını vəd etdiniz. Hörmətli Prezidentimiz, Siz vəd verdiniz, Sizin qətiyyətiniz və vədiniz üst-üstə düşdü. Siz sözünüzün sahibi oldunuz, bizi çox gözəl, yaraşıqlı qəsəbələrə köçürdünüz. Mən buna görə Bənövşələr qəsəbəsinin sakinləri adından Sizə bir daha öz minnətdarlığımı bildirirəm.

Ümummilli liderimiz Heydər Əliyev demişdir ki, insan təhsilini orta məktəbdə alır, təhsilin əsasını orta məktəb təşkil etməlidir. Bu fikri əsas götürən Heydər Əliyev Fondunun prezidenti Mehriban xanım Əliyeva 300-dən artıq məktəbə hamilik etmişdir. Hörmətli Mehriban xanım, buna görə müəllimlər adından sizə öz minnətdarlığımızı bildiririk. Siz təkcə məktəbə yox, səhiyyəyə, qocalar evinə, uşaq evlərinə də hamilik edirsiniz. Bütün bunlara görə sizə analar adından minnətdarlığımızı bildiririk.

Cənab Prezident, biz bilirik ki, bura da bizim daimi yaşayış yerimiz deyildir. Düzdür, Ağdam torpağıdır, amma hamının öz eli, öz obası vardır. Biz inanırıq ki, Sizin rəhbərliyiniz altında Ağdam şəhəri, onun ətraf kəndləri işğalçılardan azad olunacaq, biz öz doğma torpaqlarımıza dönəcək və Sizi Ağdamın fəxri vətəndaşı seçəcəyik. Hörmətli Prezident, iki aydır ki, biz bu qəsəbədə yaşayırıq. Qəsəbənin sakinləri Sizi çox həyəcanla gözləyirdilər və indi onlara xeyir-duanızı eşitmək istəyirlər.

X X X

Azərbaycan Prezidenti İlham Əliyev mərasimdə nitq söylədi.

Sonra Prezident İlham Əliyev sakinlərə yaxınlaşaraq səmimi söhbət etdi, onların qayğıları ilə maraqlandı. Məcburi köçkünlər Prezidentləri ilə fəxr etdiklərini və ümummilli lider Heydər Əliyevin layiqli davamçısı kimi ümidlərini ona bağladıqlarını bildirdilər. Dedilər ki, əminik işğal edilmiş torpaqlarımız Prezident İlham Əliyevin rəhbərliyi ilə azad olunacaq və biz öz yurd-yuvamıza qayıdaraq, Azərbaycanın gələcək inkişafını təmin edəcəyik.