Bakı, 16 iyun, AZƏRTAC

İyunun16-da Azərbaycan Respublikasının Prezidenti yanında Dövlət İdarəçilik Akademiyasında “Yerli özünüidarəetmədə gender bərabərliyinin təmin olunması: nailiyyətlər və müsbət təcrübə” istiqamətində onlayn ixtisasartırma kursunun açılışı olub.

Ailə, Qadın və Uşaq Problemləri üzrə Dövlət Komitəsindən AZƏRTAC-a bildiriblər ki, Bakı şəhəri və Abşeron rayonunu əhatə etməklə 25 yerli özünüidarəetmə orqanının məsul şəxslərinin iştirakı ilə keçirilən təlimdə Dövlət Komitəsinin sədri Bahar Muradova açılış nitqi ilə çıxış edib. O Komitənin 2008-ci ildən Dövlət İdarəçilik Akademiyası ilə birlikdə həyata keçirdiyi müxtəlif kurs və təlimlərin vacibliyini bildirib. Komitə sədri dörd gün davam edəcək budəfəki təlimin yerlərdə dövlət ailə, qadın və uşaq siyasətinin həyata keçirilməsi, gender bərabərliyinin təmin olunması istiqamətində məsul şəxslərin bilik və bacarıqlarının artırılması baxımından mühüm əhəmiyyət kəsb etdiyini diqqətə çatdırıb.

Qurumun fəaliyyəti haqqında məlumat verən Bahar Muradova bildirib ki, ailə siyasətini həyata keçirmək, öz səlahiyyətləri daxilində insan və vətəndaş hüquqlarının və azadlıqlarının, xüsusilə uşaq və qadın hüquqlarının müdafiəsini təmin etmək, bu hüquqların pozulmasının qarşısını almaq Komitənin başlıca vəzifələrindəndir. Bu siyasətin yerlərdə daha sistemli və ardıcıl həyata keçirilməsi üçün yerli icra hakimiyyətinin, onun yanında fəaliyyət göstərən Yetkinlik yaşına çatmayanların işləri və hüquqlarının müdafiəsi üzrə komissiyaların, həmçinin yerli özünüidarəetmə orqanlarının da rolu vardır. Lakin qeyd edilən bu istiqamətlərin spesifik olması və xüsusi həssaslıq tələb etməsi qarşıya digər vəzifə qoyur. Bu da həmin şəxslərdə bir sıra bilik və bacarıqların aşılanması məsələsini gündəmə gətirir.

Komitə sədri bildirib ki, hər bir regionun, ərazinin təbii və sosial-iqtisadi potensialından hərtərəfli və səmərəli istifadə etməklə orada yaşayan əhalinin həm rifahını yaxşılaşdırmaq, həm də sosial müdafiəsini gücləndirmək mümkündür. Odur ki, yerli özünüidarəetmə orqanları fəaliyyət göstərdiyi ərazinin əhalisi üçün onun problemlərini həll etmək baxımından mühüm qurum sayılır. Ümummilli lider Heydər Əliyev 1999-cu il dekabrın 12-də keçirilmiş bələdiyyə seçkiləri ilə əlaqədar xalqa müraciətində yerli özünüidarəetmə sisteminin yaradılmasının əhəmiyyətini xüsusilə vurğulamışdır. Ölkəmizin hərtərəfli, dinamik və davamlı inkişafı şəraitində bələdiyyələrin fəaliyyəti daha da təkmilləşməli, bələdiyyə nümayəndələri yerli özünüidarəetmənin inkişafı üçün yaradılmış imkanlardan bəhrələnərək öz fəallıqlarını, təşəbbüskarlıqlarını artırmalıdırlar.

B.Muradova Azərbaycanda qadın hüquqlarının müdafiəsi, gender bərabərliyinin təmin edilməsi istiqamətində qanunvericilikdə mühüm imkanların yaradılmasını xüsusi qeyd edərək bildirib ki, hökumət müvafiq gender siyasəti və gender bərabərliyi sahəsində beynəlxalq normalara uyğun inkişaf proqramlarının işlənib hazırlanmasının və reallaşdırılmasının təmin olunmasını öhdəlik kimi qəbul edib. Azərbaycanda gender bərabərliyinin bərqərar edilməsi üzrə milli mexanizmin inkişafı minillikdə qarşıya qoyulan məqsədlərə çatmaq kimi qlobal çərçivədə həyata keçirilir.

Ölkədə gender bərabərliyinin təmin olunması üzrə milli mexanizmin yaradılmasının bir neçə mərhələdən ibarət olduğunu diqqətə çatdıran Komitə sədri bildirib ki, birinci mərhələ BMT-nin qadınların vəziyyəti ilə əlaqədar IV Beynəlxalq Konfransının keçirilməsi, ikinci mərhələ gender bərabərliyinin əldə olunmasına və qadın inkişafına məsuliyyət daşıyan dövlət mexanizminin yaradılmasına başlanılması, üçüncü mərhələ isə gender bərabərliyi, siyasi qərarların qəbul edilməsində qadınların imkanlarının genişləndirilməsi sahələrində dövlət strategiyasının təməlinin qoyulması ilə səciyyələnir. Bu gün biz dördüncü mərhələni müşahidə edirik. Azərbaycanda baş verən siyasi proseslər ailənin möhkəmlənməsi və sosial müdafiəsi də daxil olmaqla qadınların müstəqilliyinin dərk edilməsinə əsaslanan yeni mexanizmin axtarışına imkan yaradır.

Komitə sədri dövlət ailə siyasətinin dəstəklənməsi istiqamətində ailə institutunun təbliği, milli-mənəvi dəyərlərin gənc nəsilə aşılanması, eləcə də qadınların cəmiyyətdə fəallığının və iştirakının artırılması məqsədilə Komitənin bələdiyyə orqanları ilə birgə 2017-2019-cu illərdə həyata keçirdiyi “Ailə akademiyası” layihəsi haqqında məlumat verib. Qeyd edib ki, layihə çərçivəsində sosioloq, psixoloq, hüquqşünas və digər ekspertlər cəlb olunmaqla qadın və kişilərin, gənc ailələrin, sosial iştirakçılığı zəif insanların iştirakı ilə maarifləndirmə tədbirlərinin həyata keçirilməsi sahəsində bələdiyyələrin rolunun daha da artırılması çox vacibdir.

Daha sonra Azərbaycan Respublikası Prezidenti yanında Dövlət İdarəçilik Akademiyasının rektoru, akademik Urxan Ələkbərov “Qlobal fövqəladə şəraitdə innovativ dövlət idarəçiliyi texnologiyaları: Azərbaycanın təcrübəsi” mövzusunda təqdimatla çıxış edərək, müasir dövrdə idarəçilik sahəsində texnologiyaların vacib əhəmiyyət kəsb etdiyini, qloballaşma dövründə özünə xüsusi yer tutduğunu bildirib. Rektor ölkəmizin bu sahədə əldə etdiyi mühüm uğur və nailiyyətləri, Azərbaycanın iqtisadi göstəricilərinə görə özünəməxsus yer tutduğunu vurğulayıb. U.Ələkbərov diqqətə çatdırıb ki, dövlətimiz innovativ idarəçilik texnologiyalarının tətbiqi nəticəsində uğurlu siyasət həyata keçirir. Ölkəmizdə strateji məqsəd kimi gender bərabərliyinin təmin olunması da aparılan uğurlu siyasətin bir hissəsidir və dünyanın bir çox inkişaf etmiş ölkələri ilə müqayisə edilə bilər. Rektor Prezident İlham Əliyev və Birinci vitse-prezident Mehriban Əliyevanın bu sahədə xidmətlərinə xüsusi diqqət çəkib. Bildirilib ki, təhsil və səhiyyə sahələrində, eləcə də siyasi və iqtisadi qərarların qəbulu proseslərində gender bərabərliyinin təmin olunması iqtisadiyyatın davamlılığına kömək edir, ümumilikdə, cəmiyyətə və bəşəriyyətə əvəzolunmaz fayda verir.

Qeyd edək ki, iyunun 16-dan 19-dək keçiriləcək onlayn təlim çərçivəsində dövlət qadın siyasəti və yerli özünüidarəetmədə gender bərabərliyi, bələdiyyələrin təşkilatçılıq fəaliyyətinin əsas aspektləri, pandemiya dövrünün gender aspektləri - beynəlxalq və milli təcrübə, milli qanunvericilikdə gender əsaslı zorakılıqla mübarizə və preventiv mexanizm, bələdiyyələrin hüquqlarının müdafiəsi istiqamətində assosiasiyaların rolu, pandemiya zamanı əmək bazarında kişilər və qadınlar üçün bərabər şəraitin yaradılması kimi mövzular müzakirə olunacaq.