Yevlax, 25 fevral, AZƏRTAC

Kənd təsərrüfatı məhsullarının istehsalında yüksək nəticənin əldə olunmasında əsas şərtlərdən biri əkin sahələrinin suvarma suyu ilə təminatı məsələsidir. Aqrar sahənin dayanıqlı və perspektivli inkişafı meliorasiya və irriqasiya işlərinin genişləndirilməsi və ona kapital qoyuluşunun artırılmasını tələb edir. "Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda Prezident İlham Əliyev meliorativ tədbirlərin infrastruktur layihələri arasında önəmli yer tutduğunu vurğulayaraq deyib: “Təqribən 80 min hektar torpağa suyun verilməsi təmin edilmişdir, 300-dən çox subartezian quyusu qazılmışdır. Bu proses bu il də davam etdiriləcək. Bu infrastruktur layihələri dövlət investisiya proqramı hesabına icra edilmişdir. Bu, bir daha onu göstərir ki, ölkəmizin dayanıqlı inkişafı üçün gözəl zəmin yaradılır".

Ölkəmizin bütün bölgələrində olduğu kimi, Yevlax rayonunda da bu istiqamətdə ardıcıl tədbirlər görülür. Meliorasiya və Su Təsərrüfatı ASC-nin Yevlax Rayon Suvarma Sistemləri İdarəsindən AZƏRTAC-ın bölgə müxbirinə bildiriblər ki, rayonun 39 min 849 hektar əkin sahəsi mexaniki və özaxımı ilə suvarılır. Mexaniki üsulla suvarma 40 ədəd nasos stansiya vasitəsilə həyata keçirilir. İdarənin balansında 80,9 kilometr beton kanal, 112 kilometr asma nov kanal, 1015 kilometr torpaq kanallar var. Suvarma kanalları üzərində 1584 ədəd müxtəlif tipli hidrotexniki qurğular mövcuddur.

Əkin sahələrini mütəşəkkil və vaxtında suvarma suyu ilə təmin etmək məqsədilə 2019-cu ildə suvarma kanalları üzərindəki 135 ədəd hidrotexniki qurğu, 9 kilometr beton kanallar və asma nov kanallar, 3 kilometr boru kəmərləri təmir edilib. Salahlı suvarma kanalının 1050 metr hissəsi beton üzlüyə alınaraq su itkisinin qarşısı alınıb və kanalın əsaslı təmiri davam etdirilir. Ərəbbəsirə beton kanalını mühafizə edən Əlican çayın sol sahilində uzunluğu 125 metr olan dəmir beton mühafizə bəndinin əsaslı təmiri başa çatdırılıb. Dövlət proqramı ilə Yevlax Suvarma Sistemləri idarəsinin balansında olan, mənbəyini Yuxarı Şirvan Kanalından götürən “R-2a” kanalının Yuxarı və Aşağı Qarxun kəndlərinin ərazisinə xidmət edən 8000 metr hissəsində Meliorasiya və Su Təsərrüfatı ASC tərəfindən cari ilin əvvəlindən başlamış əsaslı təmir-bərpa işləri başa çatdırılıb.

“Kənd Yerlərinin Kompleks İnkişafı Layihəsi” çərçivəsində torpaq məcralı suvarma kanalları 463 kilometr lildən təmizlənib, 94 kilometr beton üzlüyə alınıb, kanallar üzərində 1811 ədəd müxtəlif tipli hidrotexniki qurğular tikilib. Prezident İlham Əliyevin 2019-cu il fevralın 12-də imzaladığı “Əkin sahələrinin suvarma suyu ilə təminatının yaxşılaşdırılması və əhalinin içməli suya tələbatının ödənilməsi ilə bağlı tədbirlər haqqında” sərəncamlarına əsasən, ötən il rayonun Qaramanlı, Aran, Hacımahmudlu, Aşağı Bucaq kəndlərində 5 ədəd subartezian quyusu qazılıb.

Mövcud torpaq kanalların 497 kilometr hissəsi lildən və kol-kosdan təmizlənib. 24 ədəd nasos stansiyasında təmir işləri aparılıb, mexaniki və elektrik avadanlıqlarının hissələri yeniləri ilə əvəz olunub. Nasos stansiyaları cari ilin vegetasiya suvarılmasına tam hazır və işlək vəziyyətə gətirilib.

Yevlax rayonu üzrə 2020-ci ildə 2407 hektar torpaq sahəsində pambıq bitkisinin əkilməsi nəzərdə tutulub. Artıq 1996 hektar sahədə əkin aparılması məqsədilə müqavilə bağlanıb. Ondan 1850 hektarı şumlanıb, 900 hektarı arat edilib. Hazırda yazlıq əkinlərin suvarılması üçün hazırlıq işləri görülür.