Bakı, 1 aprel, AZƏRTAC

Bu gün 65 yaşı tamam olan AFFA-nın vitse-prezidenti Vaqif Sadıqov AZƏRTAC-a müsahibə verib. Həmin müsahibəni təqdim edirik.

- Əvvəlcə doğum gününüzü təbrik edirəm. Bu gün Vaqif Sadıqov özünü neçə yaşında hiss edir?

- Təşəkkür edirəm. Molla Nəsrəddinin bununla bağlı yaxşı bir misalı var: “Cavan yaşımda da bu daşı qaldıra bilmirdim, indiki yaşımda da”. İllər öncə necə idimsə, elə indi də eləyəm. Demək olar ki, dəyişən bir şey yoxdur. Özümü heç də pis hiss etmirəm. Hər kəsə də bu yaşda özünü ən azı mənim qədər gümrah hiss etməyi arzulayıram.

- Yəqin ki, bir çoxları kimi hədiyyə almağı sevirsiniz. Yubileyinizdə sizin üçün ən gözəl hədiyyə nə olardı?

- Mənim üçün hədiyyə anlayışı çox böyükdür. Lakin fikrimcə, ən gözəl hədiyyə hörmətdir. Bunu hər şeydən üstün hesab edirəm. Əzizlərimin doğum günümdə məni yada salıb təbrik etməsi ən böyük xoşbəxtlikdir. Xaricdə yaşayan dostlarım da bu gün məni tək qoymadılar. Çox sağ olsunlar ki, hər zaman hörmət edirlər.

- Bu gün həm də Ümumdünya Gülüş Günüdür. Belə bir gündə dünyaya gəlmək sizin üçün hansı mənanı ifadə edir?

- Sevindirici haldır ki, bu gün hamının üzündə təbəssüm var. Bu, çox xoşdur. Hər kəs gülür, bir-biri ilə zarafat edir. Arzum odur ki, heç kimin üzündən gülüş əksik olmasın.

- Yəqin ki, siz də nə vaxtsa aprelin 1-də kimisə aldatmısınız. Ən inandırıcı 1 aprel zarafatınız hansı olub?

- Düzünü desəm, zarafat etməyi xoşlayan deyiləm. Adətən mənimlə zarafat ediblər (gülür). Bu da məndə qıcıq hissi doğurmayıb, əksinə deyib-gülmüşük.

- Ömrünüzün böyük hissəsi futbolda keçib. Buna görə peşman deyilsiniz?

- Xeyr, heç vaxt buna görə peşmanlıq yaşamamışam. Hətta deyərdim ki, bu həyatı bir daha yaşasaydım, yenə futbola həsr edərdim. Buna görə də olduqca xoşbəxtəm.

- Bəzi insanlar öz yubileylərini təmtəraqlı keçirirlər. Bəs siz necə, əlamətdar günlərdə dost-tanışı ətrafınıza yığmağı sevirsiniz?

- Təmtəraqlı ad günü keçirməyi sevmirəm. Tanışlarım da məndən bu barədə soruşurlar. Ancaq mən buna üstünlük vermirəm. Bu gün çox şadam ki, AFFA rəhbərliyi ad günümü təbrik etmək üçün məni quruma dəvət etdi. Gün ərzində doğma komandam “Neftçi”nin rəhbərliyi ilə də görüşüm baş tutdu. Düzdür, həyatımda yalnız bir dəfə ad günümü təmtəraqla keçirmişəm. O da 50 yaşıma təsadüf etmişdi. Sevdiyim bütün dost və tanışlarımı birlikdə gözəl vaxt keçirmək üçün bir araya topladım. Eyni komandada forma geyindiyim veteran futbolçular, mənlə birgə işləyən məşqçilər bir yerə yığışmışdılar. Belə bir gündə onları bir arada görmək mənim üçün çox sevindirici idi.

- Bu illər ərzində ən yaddaqalan xatirəniz hansı olub?

- Yaddaqalan anlarım çox olub. Geriyə dönüb baxanda insanın ağlına təkcə xoş yox, kədərli günlər də gəlir. Bu gün pis günləri yada salmaq istəmirəm. Xatirələr hədsiz çoxdur. Peşəkar futbola addım atdığım ilk gün mənim üçün unudulmazdır. “Neftçi” kimi bir kluba dəvət aldığım həmin an heç vaxt yadımdan çıxmaz. Bu mənim üçün çox önəmli və xüsusi bir hadisədir. İsgəndər Cavadov, Asim Xudiyev, Anatoli Banişevski kimi mükəmməl oyunçularla çalışmaq mənim üçün böyük zövq idi. Əslində Azərbaycanın bir çox ulduz oyunçularının adlarını çəkə bilərəm. Onlarla eyni meydançada futbol oynamaq əla hisslər idi.

- Son olaraq, Azərbaycan futbolunun gələcəyi ilə bağlı arzularınızı eşitmək istərdik...

- Demək olar ki, 18 yaşımdan peşəkar səviyyədə futbolla məşğulam. Hər an, hər il, hər dəqiqə futbolumuzun tərəqqisini görmək istəyən adam olmuşam. İnanıram ki, bundan sonra da futbolumuz inkişaf edəcək və onların uğurlarını görüb sevinəcəyik.