Yüksək Liqa: “Araz-Naxçıvan”, “Neftçi” və “Baku Fire” ilk üçlükdə
Bakı, 15 may, AZƏRTAC
Bu gün final matçı ilə futzal üzrə Yüksək Liqada cari mövsümə yekun vurulub.
AZƏRTAC xəbər verir ki, cari mövsümdə “Araz-Naxçıvan”a yeganə xal itkisi yaşadan “Neftçi” son dueldə də sürprizə imza atmağı düşünürdü. Pley-off mərhələsində ilk oyunda yenilsə də, sonrakı 2 dueldə qələbə qazanaraq qızıl medal uğrunda oynamaq hüququ qazanan “Neftçi” final matçına itkilərlə çıxıb. Nurlan Mehdizadə və Rüfət Balakişiyev sarı vərəqə cəzalısı olduğuna görə komandasına kömək edə bilməyib. Əvəzində pley-off-da meydana çıxmayan İlkin Hacıyev və Məhəmməd Abbasov bu dəfə forma geyinmək imkanı qazanıb. “Araz-Naxçıvan”da isə uzun müddətdir zədəli olan Ponsedən başqa kənarda qalan olmayıb.
Oyunda hesab erkən açılıb. Xətai Bağırov Naxçıvan təmsilçisinə üstünlük qazandırıb. Sonrakı dəqiqələrdə taktiki baxımdan üstünlük “Araz-Naxçıvan”da olsa da, qapılar qarşısında ciddi təhlükəli vəziyyət yaradılmayıb. Sükut 14-cü dəqiqədə pozulub. Felipinyonun kobud oynaması “Neftçi”yə penalti vurmaq hüququ qazandırdı. Fürsəti əldən verməyən Namiq Məmmədkərimov tablodakı rəqəmləri eyniləşdirib. Növbəti dəfə hesab yenə standart vəziyyətin icrası ilə dəyişib. Hakim passivində 5 cərimə xalı olan “Neftçi”nin qapısına 10 metrlik zərbə təyin edib. Amadeu “9-luq”u nişan almaqla tarazlığı komandasının xeyrinə dəyişib.
İkinci hissədə də ilk qolu “Araz-Naxçıvan” vurub. Bu dəfə Felipinyo fərqi 2 topa çatdırıb. Matçın sonuna 2 dəqiqə qalmış Nata Felipe nəhayət rəqib torunu silkələyib. Braziliyalı bu qolla həm oyunun yekun nəticəsini müəyyənləşdirib, həm də Yüksək Liqada cari mövsümə yekun vurub.
Beləliklə, rəqibini 4:1 hesabı ilə məğlub edən “Araz-Naxçıvan” 29-cu Azərbaycan çempionatının qalibi olub.
“Baku Fire” isə üçüncü yer uğrunda görüşdə “Record”dan üstün olub - 23:3.
“Araz-Naxçıvan” - “Neftçi” oyunu başa çatdıqdan sonra Yüksək Liqanın 2022-2023-cü il mövsümünü ilk üç pillədə başa vuran komandalar mükafatlandırılıb.
Əvvəlcə final oyununun hakimləri - Hikmət Qafarlı, Knyaz Əmiraslanov və Əli Cəbrayılov fəxri kürsüyə dəvət olunub. Ardınca hakim-inspektor Murad Məmmədova diplom verilib.
“Baku Fire"in hücumçusu Oktay Rüstəmli (36 qol) çempionatın bombardiri olub. “Araz-Naxçıvan”dan Emin Kürdov ən yaxşı qapıçı, “Neftçi”dən Namiq Məmmədkərimov ən yaxşı oyunçu, “Baku Fire”in çalışdırıcısı Teymur Eyvazov isə ən yaxşı baş məşqçi seçilib.
“Baku Fire”ə bürünc, “Neftçi”yə gümüş, “Araz-Naxçıvan”a isə Yüksək Liqanın 2022-2023-cü il mövsümünün qalibi kimi qızıl medal, eləcə də komandaların hər birinə müvafiq diplomlar verilib. Sonda “Araz-Naxçıvan”a çempionluq kuboku təqdim olunub.
Mükafatları Azərbaycan Futzal Federasiyasının prezidenti, AFFA İcraiyyə Komitəsinin üzvü Zaur Axundov, AFFA-nın baş katibi Sərxan Hacıyev və “Neftçi” idman klubunun idarəetmə aparatının rəhbəri Sadıq Sadıqov təqdim ediblər.
Bölmənin digər xəbərləri
