Yüksək Texnologiyalar Parkı Ekspertlər şurasının onlayn iclası keçirilib
Bakı, 17 iyun, AZƏRTAC
AMEA-nın Yüksək Texnologiyalar Parkı (YT Park) Ekspertlər şurasının onlayn iclası keçirilib.
AMEA-dan AZƏRTAC-a bildirilib ki, onlayn iclasda şuranın sədri, akademik Rasim Əliquliyev AMEA Rəyasət Heyətinin 2020-ci il 15 may tarixli qərarının icrasından irəli gələn vəzifələrə dair çıxış edərək, bu məsələlərin qeyd olunan tarixdə AMEA-nın prezidenti, akademik Ramiz Mehdiyevin sədrliyi ilə keçirilən onlayn iclasında müzakirəyə çıxarıldığını xatırladıb. Qeyd edib ki, AMEA rəhbəri iclasda YT Parkın müasir tələblərə cavab verən və ölkə iqtisadiyyatına mühüm töhfələr verən quruma çevrilməsi, müəssisənin yeni inkişaf konsepsiyasının hazırlanması, akademiya alimlərinin bugünədək əldə etdikləri elmi nailiyyətlərin tətbiqi və perspektivli layihələrin maliyyələşdirilməsi, həmçinin postpandemiya dövründə respublikanın təhsil və elmi müəssisələrinin tələbatları ilə bağlı mütəmadi olaraq dəyirmi masaların keçirilməsi üçün müvafiq tapşırıqlar verib.
“Yüksək Texnologiyalar Parkı ölkəmizdə elmin kommersiyalaşdırılması və texnologiyaların transferi, dövlətin elmi tutumlu məhsullara tələbatının ödənilməsi, müxtəlif qurumlarla elmi müəssisələr arasında əlaqələr yaradılması, bank sektorunun cəlb edilməsi istiqamətlərində xüsusi rola malikdir”, - deyən akademik R.Əliquliyev YT Park qarşısında duran vəzifələrə yenidən baxılması, eləcə də bu qurumda rəqabətədavamlı texnoloji məhsullar hazırlanması, ölkənin intellektual potensialının cəlb olunması, xarici ölkələrdən investisiya axınının həyata keçirilməsi, o cümlədən startaplara dəstək verilməsi kimi mühüm işlərin icrasının zəruriliyini vurğulayıb. Ölkəmizdə milli intellektual potensiala böyük tələbat yarandığını deyən şura sədri istər hərbi, istər strateji və digər dövlət qurumlarından sifarişlərin qəbulu əsasında YT Parkın fəaliyyət istiqamətlərinin inkişaf etdirilməsinin vacib məsələlərdən olduğunu bildirib.
Akademik R.Əliquliyev YT Parkın yeni inkişaf konsepsiyasının hazırlanmasında beynəlxalq təcrübənin, ölkə qanunvericiliyinin, biliklər iqtisadiyyatının tələblərinin, milli innovativ mühitin formalaşmasının əsas prinsipləri rəhbər tutularaq nüvə, nano, bio və informasiya texnologiyaları da daxil olmaqla bütün mümkün istiqamətlər üzrə perspektivlərin nəzərə alınmasının önəmini vurğulayıb. O, şura üzvlərinə elmi müəssisələr və rezidentlərlə sıx əlaqələr quraraq mövcud problemlərin həllində yaxından iştirak etməyi tövsiyə edib.
Daha sonra AMEA Yüksək Texnologiyalar Parkında son dövrlərdə aparılan islahatlar barədə bu qurumun baş direktoru, akademik Əli Abbasov çıxış edib. O, elmi nəticələrin kommersiyalaşdırılmasının YT Parkın əsas vəzifələrindən biri olduğunu qeyd edərək, AMEA-nın prezidenti, akademik Ramiz Mehdiyevin rəhbərliyi ilə bu istiqamətin inkişafına xüsusi diqqət yetirildiyini vurğulayıb.
YT Parkın yeni inkişaf konsepsiyasının hazırlanması ilə bağlı görülən işlərdən söz açan akademik Ə.Abbasov deyib ki, müəssisədə problemlərin həll olunması və çatışmazlıqların aradan qaldırılması ilə əlaqədar olaraq müvafiq komissiyalar yaradılıb, bir sıra vacib işlər görülüb. O, Parkın mövcud vəziyyətinin qiymətləndirilməsi və qurumun qarşısında duran hədəflərin müəyyənləşdirilməsindən danışaraq, hazırda məsləhətçi şirkətlərlə əlaqələr yaradıldığını, təkliflər irəli sürüldüyünü söyləyib. Alim yeni inkişaf konsepsiyasının hazırlanmasında AMEA-nın müvafiq elmi müəssisələrinin iştirakı və dəstəyinin önəmini qeyd edib. Direktor koronavirus pandemiyası və xüsusi karantin rejimi ilə əlaqədar olaraq virtual məkanda fəaliyyətin genişləndirilməsinin zəruriliyini bildirib. O, YT Parkın fəaliyyəti ilə bağlı məlumatların ictimaiyyətə mütəmadi çatdırılması, eləcə də müxtəlif səmərəli əməkdaşlıqların təşkili məqsədilə bu müəssisənin veb-saytının təkmilləşdirilməkdə olduğunu deyib. Alim, həmçinin YT Parka ali məktəblər, gənc tədqiqatçılar və tələbələrin cəlb olunması, startap layihələrin həyata keçirilməsi, dünya təcrübəsinin öyrənilməsi və beynəlxalq əməkdaşlığın inkişafı, eləcə də kadr potensialının gücləndirilməsi ilə bağlı fikirlərini səsləndirib.
İclasda İdarəetmə Sistemləri İnstitutunun direktoru, akademik Telman Əliyevin təşəbbüsü ilə hazırlanan bir sıra layihələrə dair fikir mübadiləsi aparılıb, onların YT Parkda tətbiqi məsələləri müzakirə olunub. T.Əliyev rəhbərlik etdiyi institutda hazırlanan, böyük elmi tutuma və iqtisadi əhəmiyyətə malik olan, dəniz platformalarında, qazma prosesində, neft-qaz kəmərlərində baş verən qəzalarla bağlı problemləri nəzərdə tutan bir sıra layihələrin YT Parkla birgə həyata keçirilməsinin əhəmiyyətini və perspektivlərini diqqətə çatdırıb.
Daha sonra Ekspertlər şurasının katibi, akademik Vaqif Fərzəliyev YT Parkın rezidenti olan müəssisələr barədə danışıb. Həmçinin rezident kimi qeydiyyata alınmaq üçün müraciət etmiş “EMSYS” MMC və “IntelPRO” MMC şirkətlərinin təhsilin idarəedilməsi, məsafədən onlayn tədris sistemi, eləcə də pilotsuz uçan aparatların layihələndirilməsi və istehsalı ilə bağlı layihələri haqqında ətraflı məlumat verib.
Şura üzvləri şirkətlərin innovasiya layihələrinə dair münasibət bildirdikdən sonra səsvermə keçirilib, adıçəkilən iddiaçılara rezidentlik statusunun verilməsi barədə qərar qəbul olunub.
Sonda Ekspertlər şurası üzvlərinin bir sıra sualları cavablandırılıb.
Bölmənin digər xəbərləri
