ELM VƏ TƏHSİL
Yüksək Texnologiyalar Parkına yeni rezident qəbul olunub
![](/files/galleryphoto/2021/2/1200x630/1625671030448399830_1200x630.jpg)
![](/files/galleryphoto/2021/2/1200x630/16256710303344056189_1200x630.jpg)
![](/files/galleryphoto/2021/2/1200x630/16256710302901639526_1200x630.jpg)
Bakı, 7 iyul, AZƏRTAC
İyulun 7-də AMEA Yüksək Texnologiyalar Parkı (YT Park) Ekspertlər şurasının növbəti onlayn iclası keçirilib.
YT Parkdan AZƏRTAC-a bildirilib ki, “Zoom” platforması üzərindən keçirilən tədbiri giriş sözü ilə şuranın sədri, AMEA-nın vitse-prezidenti, akademik Rasim Əliquliyev açıb. O, iclasın “Proline Chemicals” MMC YT Parkın rezidenti kimi qeydiyyata alınması məsələsinə həsr olunduğunu bildirib.
Daha sonra “Proline Chemicals” MMC-nin təsisçisi və rəhbəri Vüqar Həsənov mikro və makro silikon emulsiyalarından istifadə olunmaqla müxtəlif bərk səthlər üzərində nanohissəciklərdən ibarət hidrofob və antistatik qoruyucu təbəqə yaradan vasitələrin istehsalı ilə bağlı investisiya layihəsi haqqında məlumat verib. O, yüksək keyfiyyətli və effektiv professional yuyucu və təmizləyici vasitələrin istehsalı ilə məşğul olan şirkətin əsas fəaliyyət istiqamətlərini avtoyuma və avtokosmetika, məişət, sənaye və avtomobil kimyası, avtomobillər üçün texniki mayelər təşkil etdiyini vurğulayıb.
Məhsulların hazırlanması zamanı dünyanın aparıcı istehsalçıları tərəfindən istehsal olunan keyfiyyətli xammallardan istifadə edildiyini deyən “Proline Chemicals”ın rəhbəri qeyd edib ki, şirkət toplanmış biliklərə və müasir elmi nailiyyətlərə əsaslanaraq daim mövcud reseptlərin effektivliyinin artırılması və innovativ məhsulların istehsalı üzərində çalışır.
V.Həsənov “Proline Chemicals”ın qeyd olunan layihəsinin mövcud istehsal bazası əsasında AMEA YT Park ərazisində həyata keçirilməsinin nəzərdə tutulduğunu vurğulayıb. O, bunun üçün müəssisənin öz istehsal avadanlığı, müəyyən qədər xammal ehtiyatları, maliyyə vəsaitləri və işçi heyətinin olduğunu diqqətə çatdırıb, istehsal olunacaq məhsullar barədə məlumat verib. V.Həsənovun sözlərinə görə, investisiya layihəsinin məqsədi istehsalı nəzərdə tutulan məhsullar üzrə seçilən müştəri seqmentinin bütün tələbatlarını daxili istehsal hesabına təmin etməklə yanaşı, analoji məhsullar üzrə idxaldan asılılığın azaldılması və yeni iş yerlərinin açılması hesabına əmək resurslarının cəlb edilməsidir.
O, həmçinin perspektivdə nəzərdə tutulan işlərdən bəhs edərək yeni avadanlığın alınması, yeni qablaşmalar üçün pres formaların, yeni etiketlərin dizayn edilməsi və hazırlanması, yeni xammal növlərinin alınması və digər dövriyyə vəsaitlərinin artırılmasının planlaşdırıldığını bildirib.
Sonra müzakirələr aparılıb, “Proline Chemicals” MMC-nin YT Parkın rezidenti kimi qəbul edilməsinə dair səsvermə keçirilib. Səsvermənin nəticələrinə əsasən, adıçəkilən iddiaçıya rezident statusu verilməsi qərara alınıb.