Zaqatalada aksiya çərçivəsində 450-yə yaxın sakin müayinə olunub
Zaqatala, 13 aprel, Mustafa Dadaşov, AZƏRTAC
Səhiyyə Nazirliyi, “PAŞA Holding” və All Medical klinikasının birgə təşəbbüsü ilə reallaşan “Erkən müayinə can qurtarır” adlı tibbi aksiyanın növbəti ünvanı Zaqatala rayonu olub.
AZƏRTAC-ın bölgə müxbiri xəbər verir ki, Azərbaycanın müxtəlif bölgələrində sağlamlıqla bağlı maarifləndirmə və erkən diaqnostika təşəbbüslərini genişləndirməyi qarşısına məqsəd qoyan “Fərqindəlik” layihəsi çərçivəsində aprelin 13-də Zaqatala şəhərindəki “Hayat Hospital”da tibbi aksiya keçirilib. Diabet xəstəliyinin erkən müayinəsi üçün təşkil olunan aksiyada Zaqatala və ətraf rayonlardan sakinlər iştirak ediblər.
“Fərqindəlik” layihəsinin rəhbəri Şəbnəm Həsənova bildirib ki, aksiyanın məqsədi sağlamlıq xidmətlərini insanlara yaxınlaşdırmaq, mütəmadi tibbi müayinənin önəmini bir daha gündəmə gətirmək, diabet xəstəliyinin erkən mərhələlərində diaqnostikasını aparmaq və xəstəliyin qarşısını almaqdır. “Layihənin məqsədi təkcə tibbi baxış keçirmək deyil, həm də insanlara davamlı və faydalı sağlamlıq vərdişləri aşılamaq, yerli əhali arasında sağlam həyat tərzi barədə maarifləndirməni gücləndirməkdir”,- deyə layihə rəhbəri əlavə edib.
Aksiyada təcrübəli həkim heyəti sakinlərə tam ödənişsiz tibbi xidmətlər, qan analizləri, şəkər və təzyiq ölçümü, eləcə də endokrinoloji, terapevtik və digər ixtisaslaşmış sahələr üzrə fərdi məsləhətlər təqdim edib. Aksiya çərçivəsində xüsusilə şəkərli diabetlə bağlı risklərə dair geniş məlumatlandırma aparılıb. Bölgə üçün aktual olan yod çatışmazlığı da aksiyanın diqqət mərkəzində olub. Həkimlər bu mövzuda geniş məlumat verərək, vətəndaşlara düzgün qidalanma və əlavə dəstək vasitələri ilə bağlı tövsiyələr veriblər.
Tədbir zamanı şəkərli diabetlə bağlı ilkin əlamətlər müəyyən edilən şəxslərə qlükometr cihazları – şəkər ölçən aparatlar hədiyyə olunub. Bu cihazlar vasitəsilə artıq həmin vətəndaşlar öz şəkər səviyyələrini ev şəraitində rahatlıqla izləyə, həyat keyfiyyətlərini daha yaxşı idarə edə biləcəklər.
Ümumiyyətlə, gün ərzində davam edən tibbi aksiyada 450-yə yaxın sakin iştirak edib. Müayinələr zamanı xeyli sayda insanda zob xəstəliyinin əlamətləri müəyyən edilib.
Müayinələrdə iştirak edən vətəndaşlar tibbi aksiyanın əhəmiyyətini yüksək qiymətləndirərək onlar üçün yaradılan şəraitə görə təşkilatçılara minnətdarlıqlarını bildiriblər.
“Sakinlərin aksiyada fəal iştirakı bir daha göstərir ki, insanlar sağlamlıqlarına önəm verir, doğru məlumat və xidmətə çıxış imkanına ehtiyac duyurlar. “Fərqindəlik” layihəsi bu boşluğu doldurmaqla yanaşı, ölkə üzrə tibbi maariflənməyə və önləyici tədbirlərə ciddi töhfə verir”,- deyə layihənin rəhbəri Şəbnəm Həsənova qeyd edib.
“Erkən müayinə can qurtarır” adlı növbəti aksiyanın Gəncə şəhərində təşkil edilməsi nəzərdə tutulur.
Bölmənin digər xəbərləri
