ZAQATALADA BƏDƏN TƏRBİYƏSİ VƏ İDMAN GÜNÜ GENİŞ QEYD OLUNDU
Toplantı iştirakçıları əvvəlcə Azərbaycan idmanının müasir tarixinin təşəkkül və tərəqqisində böyük xidmətləri olmuş xalqımızın ümummilli lideri Heydər Əliyevin əziz xatirəsini bir dəqiqəlik sükutla yad etmişlər.
Toplantıda “Azərbaycan idmanının müasir tarixi və inkişafı” mövzusunda məruzə edən Zaqatala Rayon Gənclər və İdman İdarəsinin rəisi Araz Əliyev son dövrlər ölkəmizdə idmanın kütləviliyinin təmin olunması, onun maddi-texniki bazasının daha da möhkəmləndirilməsi, beynəlxalq standartlara cavab verən yeni idman qurğularının tikintisi, idman sahəsində beynəlxalq əlaqələrin və əməkdaşlığın genişləndirilməsi, idmançıların mükafatlandırılması, onların sosial-məişət şəraitinin daha da yaxşılaşdırılması sahəsində dövlət rəhbərliyi səviyyəsində ardıcıl və məqsədyönlü tədbirlərin həyata keçirildiyini xüsusi qeyd etmiş, Zaqatala idmançılarının respublika və beynəlxalq səviyyəli yarışlarda qazandıqları uğurlardan söhbət açmışdır.
Tədbirdə Zaqatala Rayon İcra Hakimiyyətinin başçısı Asif Əsgərov, tanınmış idmançılar çıxış edərək idman ictimaiyyətini əlamətdar gün münasibətilə təbrik etmiş, respublikamızda idmanın inkişafına göstərilən yüksək diqqət və qayğıya görə Azərbaycan Prezidenti, Milli Olimpiya Komitəsinin rəhbəri İlham Əliyevə dərin minnətdarlığını bildirmişlər.
Sonra 2005-ci ildə respublika və beynəlxalq səviyyəli yarışlarda yüksək nəticələr əldə etmiş Zaqatala idmançılarının bir qrupuna və onların məşqçilərinə rayon icra hakimiyyətinin, gənclər və idman idarəsinin Fəxri fərmanları və qiymətli hədiyyələri təqdim edilmişdir.
Toplantı bayram konserti ilə başa çatmışdır.
