Zəfər Günü Azərbaycan xalqı üçün həm qürur, həm də məsuliyyət günüdür – ŞƏRH
Bakı, 7 noyabr, AZƏRTAC
8 Noyabr - Zəfər Günü Azərbaycan xalqının milli yaddaşında təkcə hərbi qələbə və torpaqların azad olunması günü kimi deyil, həm də dövlətçilik iradəsinin, milli birliyin və tarixi ədalətin bərpasının rəmzi kimi əbədi yer tutub. Bu gün 30 ilə yaxın davam edən işğal dövrünə son qoyan, xalqın əzmini, dövlətin gücünü və ordunun peşəkarlığını dünyaya nümayiş etdirən tarixi dönüş nöqtəsidir. 2020-ci ilin 44 günlük Vətən müharibəsində əldə olunan möhtəşəm Zəfər Azərbaycan Respublikasının Prezidenti, Müzəffər Ali Baş Komandan İlham Əliyevin uzaqgörən siyasətinin, xalqın birliyinin və milli həmrəyliyin təntənəsidir. Azərbaycan dövləti 1990-cı illərin əvvəllərində müstəqilliyini bərpa etsə də, Ermənistanın təcavüzü nəticəsində torpaqlarının 20 faizini itirmişdi.
Bu fikirləri AZƏRTAC-a müsahibəsində Milli Məclisin deputatı Tahir Mirkişili deyib. O bildirib ki, uzun illər beynəlxalq hüququn tələblərinə baxmayaraq, BMT Təhlükəsizlik Şurasının qətnamələri icra olunmadı, beynəlxalq təşkilatların ikili standartlara əsaslanan yanaşmaları ədalətin bərpasını gecikdirdi. Lakin Azərbaycan bu dövrdə nə işğalla barışdı, nə də milli maraqlarından geri çəkildi. Dövlət rəhbərliyinin qətiyyətli siyasəti, iqtisadi və hərbi potensialın sistemli şəkildə gücləndirilməsi, diplomatik fəaliyyətin ardıcıl və məqsədyönlü olması qələbənin strateji əsasını formalaşdırdı.
Deputat bildirib ki, Prezident İlham Əliyevin “Hər birimiz azadlıq gününü öz işimizlə yaxınlaşdırmalıyıq” fikri illər boyu dövlət siyasətinin ideoloji mahiyyətinə çevrildi: “Bu yanaşma hər bir vətəndaşın üzərinə tarixi məsuliyyət qoydu. Məhz bu milli həmrəylik, dövlət və xalq arasında qarşılıqlı inam, Azərbaycanı 2020-ci ildə tarixinin ən parlaq səhifəsinə gətirib çıxardı. Sentyabrın 27-də başlayan Vətən müharibəsi cəmi 44 gün davam etdi və noyabrın 8-də Azərbaycanın ərazi bütövlüyü bərpa olundu. Şanlı Ordumuzun qəhrəmanlığı, Müzəffər Ali Baş Komandanın dəmir iradəsi, xalqın sarsılmaz dəstəyi bu Zəfərin üç dayağını təşkil etdi.
8 Noyabr - Zəfər Günü Azərbaycanın regional və qlobal mövqeyini də köklü şəkildə dəyişdi. Bu qələbə nəticəsində Cənubi Qafqazda yeni siyasi reallıq formalaşdı. Artıq regionda geosiyasi balansın əsas təməlini Azərbaycan müəyyən edir. Qələbə həm də beynəlxalq münasibətlər sistemində milli gücə əsaslanan siyasətin səmərəliliyini sübut etdi. Azərbaycan beynəlxalq hüququn norma və prinsiplərini bərpa etməklə yanaşı, beynəlxalq ədalətsizliyə qarşı mübarizədə nümunəvi dövlət obrazı formalaşdırdı. Zəfərdən sonra həyata keçirilən bərpa və quruculuq prosesləri bu qələbənin davamlı inkişaf mərhələsinə çevrildiyini göstərir. İşğaldan azad edilmiş ərazilərdə həyata keçirilən “Böyük Qayıdış” Proqramı təkcə infrastrukturun bərpasını deyil, həm də sosial, mədəni və mənəvi həyatın yenidən dirçəlişini təmin edir. Ağıllı şəhər və kənd konsepsiyaları, yaşıl enerji zonalarının yaradılması, yeni yollar, hava limanları, elektrik stansiyaları və sosial obyektlər Zəfərin praktiki nəticələrinin göstəricisidir. Qarabağ və Şərqi Zəngəzur bu gün müasir Azərbaycan modelinin avanqardına çevrilir. Zəfərin ən böyük mənəvi dəyəri isə şəhidlərimizin qəhrəmanlığı və xalqın birliyidir. Vətən uğrunda canını fəda edən igid oğul və qızlarımız Azərbaycanın əbədi şərəf salnaməsində ən uca yeri tuturlar. Onların qəhrəmanlığı dövlətin və xalqın ruhunda əbədi yaşayır. Bu gün azad edilən torpaqlarda yenidən səslənən azan səsi, dalğalanan üçrəngli bayraq, inşa olunan yeni məktəblər, açılan mədəniyyət mərkəzləri bu qurbanların müqəddəsliyini və Zəfərin əzəmətini xatırladır. Azərbaycanın müasir dövlət quruculuğunda Zəfər Günü həm də milli ideologiyanın əsas dayaqlarından birinə çevrilib”.
Tahir Mirkişili bildirib ki, bu tarix hər bir vətəndaş üçün məsuliyyət, qürur və ilham mənbəyidir: “Prezident İlham Əliyevin rəhbərliyi ilə postmüharibə mərhələsində həyata keçirilən siyasət ölkənin dayanıqlı inkişafını, sülh və təhlükəsizlik arxitekturasının qurulmasını, eləcə də beynəlxalq nüfuzunun artmasını təmin edir. Azərbaycan bu gün regionda sülhün təşəbbüskarı, sabitliyin və əməkdaşlığın aparıcı qüvvəsidir. Zəfər Günü həm də gələcək nəsillər üçün dərsdir: milli birliyin, dövlətə inamın və müstəqillik iradəsinin gücü qarşısında heç bir təcavüz dayana bilməz. Azərbaycan xalqı bu tarixi qələbə ilə sübut etdi ki, milli mənəviyyata, ədalətə və dövlətə sədaqət əsasında qurulan cəmiyyət ən mürəkkəb sınaqlardan qalib çıxmaq gücünə malikdir.
8 Noyabr - Zəfər Günü bütün Azərbaycan xalqı üçün həm qürur, həm də məsuliyyət günüdür. Qələbə yalnız 2020-ci ilin hərbi-siyasi reallığı ilə məhdudlaşmır, o, gələcəyə inamın, dövlət müstəqilliyinin möhkəmliyinin və milli birliyin təntənəsidir. Zəfər Azərbaycan xalqının tarixi iradəsinin, Prezident İlham Əliyevin müdrik və qətiyyətli liderliyinin nəticəsidir. Hər bir vətəndaş bu Zəfərin qorunması, ölkənin güclənməsi və gələcək nəsillərə sabit, azad və firavan Vətən mirası buraxılması üçün öz məsuliyyətini dərk etməlidir.
Zəfərin ideoloji və mənəvi mahiyyəti bu gün hər bir azərbaycanlının həyatında yaşayır. Çünki bu qələbə təkcə bir dövrün hadisəsi deyil, müstəqil dövlətçilik tariximizin daimi dayağı, milli kimliyimizin ayrılmaz parçasıdır. 8 Noyabr xalqımızın əzmini, dövlətimizin qüdrətini və müstəqilliyimizin əbədiliyini simvolizə edən əziz gündür”.
Bölmənin digər xəbərləri
