Bakı, 8 noyabr, AZƏRTAC

Zəfər Günü münasibətilə Ədliyyə Nazirliyinin Penitensiar Xidmətinin Mühafizə Alayının “N” saylı hərbi hissəsində vətənin keşiyində dayanan əsgərlərlə “Zəfər Yolu” İctimai Birliyinin nümayəndələrinin və ziyalıların iştirakı ilə tədbir keçirilib.

AZƏRTAC xəbər verir ki, Azərbaycanın Dövlət Himni səsləndirildikdən sonra şəhidlərimizin xatirəsi bir dəqiqəlik sükutla yad edilib.

“Zəfər Yolu” İB-nin sədri, şair, publisist Pərvanə Abdullayeva əsgərlərimizi Zəfər bayramı münasibətilə təbrik edərək, Ali Baş Komandan İlham Əliyevin sərkərdəliyi ilə Vətənimizi Zəfərə, qalibiyyətə çatdıran igidlərimizin rəşadətindən söz açıb.

İctimai Birliyin fəxri üzvü, deputat Jalə Əhmədova çıxışında düşmən üzərində tarixi Qələbəmizin əhəmiyyətindən danışıb. Deyib ki, bu Zəfərə görə başda Prezident İlham Əliyev olmaqla, Ordumuza, şəhidlərimizə və qazilərimizə borcluyuq.

Vətən müharibəsinin şəhidi Elmar Nəbiyevin anası, təqaüddə olan ədliyyə mayoru Çiçək Biləndərli qeyd edib ki, xalqımız bu Qələbəni şəhidlərimizin, qazilərimizin qəhrəmanlıqları sayəsində qazanıb. “Bu Zəfərdə mənim balamın da payı var. O, şəhid olsa da erməni vandallarının tapdağı altında qalan Vətən torpaqlarını xilas edənlərdən, bayrağımızı ucaldanlardan biri oldu. Şəhid anası kimi oğul itirmək çox ağırdır, lakin şəhid anası kimi belə bir oğulun anası olduğumuza görə qürurluyam”, - deyə o bildirib.

Tədqiqatçı-jurnalist Aida Eyvazlı Göytürk çıxış edərək 2016-cı ilin Aprel döyüşlərində Vətən torpaqlarını düşməndən azad edən şəhid və qazilərin qəhrəmanlığına həsr etdiyi “Qalibiyyət: şahidlər və şəhidlər”. “Samir, Nazim, Elşən”, eləcə də türk dünyasının tarixindən bəhs edən kitablarını hərbi hissənin əsgərlərinə hədiyyə edib. Diqqətə çatdırıb ki, Azərbaycan oğullarının qazandığı Zəfər bütövləşən türk dünyasının Qələbəsidir. Bu Zəfəri, bu Vətəni qoruyan əsgərlərimiz çox xoşbəxtdirlər.

Daha sonra Əməkdar jurnalist Elnarə Dərziyeva, Elm və Təhsil Nazirliyinin Genetik Ehtiyatlar İnstitutunun elmi işçisi Şənay İbrahimova, “Milli Cəbhə” partiyasının sədr müavini Tural İrfan, Media Təhlil Mərkəzinin əməkdaşı Babək Zeynalov çıxış edərək əsgər və zabitləri Zəfər bayramı münasibətilə təbrik ediblər.

Ədliyyə Nazirliyinin Penitensiar Xidmətinin Mühafizə Alayının “N” saylı hərbi hissəsinin komandiri ədliyyə mayoru Kamran Quliyev Ali Baş Komandan İlham Əliyevin rəhbərliyi ilə mənfur düşməni məğlub edərək 30 ilə yaxın işğal altında qalmış torpaqlarımızı azad edən qəhrəmanlarımızın qanları ilə tarix yazmalarından, hərbi hissənin əsgərlərinin hər zaman Vətənin müdafiəsində şərəflə və vicdanla dayanmalarından danışıb.

Sonra konsert proqramı təqdim olunub.