Zəfər Gününün ikinci ildönümü Pakistanda təntənəli şəkildə qeyd olunub VİDEO
Bakı, 8 noyabr, AZƏRTAC
Azərbaycan Respublikasının Pakistandakı səfirliyi ölkəmizin Zəfər Gününün ikinci ildönümü ilə əlaqədar bu ölkədə rəsmi qəbul təşkil edib.
Pakistanın müdafiə naziri Xavaca Məhəmməd Asifin əsas qonaq qismində təşrif buyurduğu qəbulda, bu ölkənin federal nazirləri - Dövlətlər və Sərhəd Regionları üzrə Məhəmməd Talha Mahmud, Müdafiə İstehsalı üzrə Məhəmməd İsrar Tarin, Parlament İşləri üzrə Murtaza Caved Abbasi iştirak ediblər. Həmçinin qəbula senatorlar, xarici ölkələrin buradakı səfirləri, diplomatlar, eyni zamanda, Pakistanın dövlət qurumlarının, ictimai, mədəni, işgüzar dairələrinin nümayəndələri, Silahlı Qüvvələrinin yüksək rütbəli zabitləri, KİV təmsilçiləri, eləcə də orada yaşayan azərbaycanlılar iştirak ediblər.
Ölkəmizin Pakistandakı səfirliyindən AZƏRTAC-a bildiriblər ki, əvvəlcə Vətən müharibəsi şəhidlərinin xatirəsi bir dəqiqəlik sükutla yad edilib.
Azərbaycan və Pakistanın dövlət himnlərinin səsləndirilməsindən sonra çıxış edən səfir Xəzər Fərhadov iki ildir ölkəmizdə 8 Noyabr tarixinin Zəfər Günü kimi qeyd olunduğunu bildirib. Tarixi Qələbəmizin ikinci ildönümünü münasibətilə təşkil olunmuş bu tədbiri bizimlə birlikdə qeyd etdikləri üçün qonaqlara öz təşəkkürünü çatdırıb.
Səfir Ermənistanın Azərbaycanın tarixi torpaqlarını 30 il boyunca qanunsuz şəkildə işğal atında saxladığını və BMT TŞ-nin müvafiq qətnamələrinin bu müddət ərzində işğalçı dövlət tərəfindən yerinə yetirilmədiyini diqqətə çatdırıb. Ermənistan tərəfindən azərbaycanlıların etnik təmizləməyə məruz qaldığını və işğal nəticəsində 1 milyon həmvətənimizin qaçqın və məcburi köçkün vəziyyətinə düşdüyünü vurğulayıb.
X.Fərhadov işğal zamanı Ermənistan tərəfindən şəhər və kəndlərin, tarixi abidələrin yerlə-yeksan edildiyini, 67 məsciddən 65-nin dağıdıldığını, eləcə də müsəlmanları təhqir etmək məqsədilə məscidlərin heyvanlar üçün sığınacaq kimi istifadə olunduğunu qeyd edib.
44 günlük Vətən müharibəsindən söz açan səfir Silahlı Qüvvələrin Ali Baş Komandanı, Prezident İlham Əliyevin rəhbərliyi ilə müzəffər Ordumuzun 2020-ci ildə tarixi torpaqlarımızı erməni işğalından azad etdiyini, Azərbaycanın ərazi bütövlüyünün və 1 milyon azərbaycanlı qaçqın və məcburi köçkünün fundamental hüquqlarının bərpa olunduğunu diqqətə çatdırıb. Həmçinin müzəffər Ordumuzun BMT TŞ-nin kağız üzərində qalmış müvafiq qətnamələrini tək başına icra etdiyini ifadə edib.
Səfir işğaldan azad edilmiş ərazilərdə Azərbaycan hökuməti tərəfindən aparılan genişmiqyaslı bərpa və quruculuq işlərindən söhbət açıb, Füzuli və Zəngilan beynəlxalq hava limanları, Zəngilan rayonunda “ağıllı kənd” konsepsiyası əsasında yenidən salınmış Ağalı kəndi, eləcə də ölkəmiz tərəfindən başladılmış Böyük Qayıdış proqramı barədə məlumatları xüsusilə qonaqların diqqətinə çatdırıb.
Çıxışı əsnasında iki qardaş ölkə arasındakı yüksək səviyyəli münasibətlərə də toxunan X.Fərhadov Pakistanın həm keçmiş Qarabağ münaqişəsi, həm də Vətən müharibəsi dövründə Azərbaycana siyasi və mənəvi dəstək göstərdiyini ifadə edib. Bu dəstəyin Azərbaycan hökuməti və xalqı tərəfindən yüksək qiymətləndirildiyini vurğulayıb.
Qəbulda əsas qonaq qismində iştirak edən Pakistanın müdafiə naziri Xavaca Məhəmməd Asif çıxışı zamanı əvvəlcə Azərbaycan hökumətini və xalqını Zəfər Günü münasibətilə təbrik edib. Azərbaycanın öz tarixi torpaqlarını erməni işğalından azad etməsinin Pakistan xalqı arasında böyük sevinclə qarşılandığını dilə gətirib. Azərbaycan və Pakistanın iki qardaş ölkə olduğunu qeyd edən nazir ölkələrimiz arasında bütün sahələr üzrə əlaqələrin bundan sonra da yüksələn xətlə inkişaf edəcəyini əminliklə ifadə edib.
Sonda Zəfər Gününün ikinci ildönümü münasibətilə hazırlanmış rəmzi tort kəsilib və xatirə şəkilləri çəkilib.
Tədbirin rəsmi hissəsindən sonra pakistanlı müğənni Əsəd Qureyşi tərəfindən Azərbaycan və Pakistan musiqiləri, eləcə də səfirliyin əməkdaşı Baba İslamov tərəfindən saz ifa olunub. İfalar qonaqlar tərəfindən böyük rəğbətlə qarşılanıb.
Tədbirdə, həmçinin tarixi Qələbəmizi, eləcə də işğaldan azad edilmiş ərazilərimizdə aparılan bərpa və quruculuq işlərini özündə əks etdirən çoxsaylı videoçarxlar nümayiş etdirilib.
Bölmənin digər xəbərləri
